Ուկրաինայի ընդդիմությունը, նախագահի կողմից անօրինականորեն արտակարգ դրություն հայտարարելու դեպքում, սպառնում է զավթել իշխանությունը: Այս մասին է հաղորդում «Интерфакс»-ը:
«Յանուկովիչի կողմից ոչսահմանադրականորեն Ուկրաինայում արտակարգ դրություն հայտարարելու դեպքում Ազգային դիմադրության շտաբը, հիմնվելով ժողովրդի կամքի վրա, նախագահին, նախարարների կաբինետին, պետական իշխանության այլ օրգաններին ոչ լեգիտիմ կհայտարարի և ստիպված կլինի իր վրա վերցնել երկրում տիրող իրավիճակի պատասխանատվությունը»,- ասվում է Ազգային դիմադրության շտաբի՝ ժողովրդին ուղղված հայտարարության մեջ:
Շտաբը, արտակարգ դրություն մտցնելու դեպքում, Ուկրաինայի բոլոր քաղաքացիներին կոչ է անում հավաքվել Կիևի Անկախության հրապարակում, իսկ ուժային կառույցների աշխատակիցներին՝ չմասնակցել «ռեժիմի անօրինական գործողություններին՝ սահմանափակելով քաղաքացիների իրավունքներն ու ազատությունը»:
Ուկրաինայի Սահմանադրության համաձայն՝ երկրի նախագահը իրավունք ունի ԱԴ ռեժիմ մտցնելու վերաբերյալ հրաման արձակել, որը կարող է ուժի մեջ մտնել միայն Գերագույն Ռադայի կողմից հաստատվելու դեպքում:
