Ընտրական օրենսդրության բարեփոխումների աշխատանքային խմբի հրավերով դեկտեմբերի 7-ին Երևանում հանրային քննարկման դրվեցին 2012թ. մայիսի 6-ին կայացած խորհրդարանական, 2013թ. փետրվարի 18-ին կայացած նախագահական ընտրությունների վերաբերյալ դիտորդական առաքելություն իրականացրած միջազգային և տեղական կազմակերպությունների ներկայացրած առաջարկությունները:
ԿԸՀ նախագահ Տիգրան Մուկուչյանը նշեց, որ առաջարկ է եղել դպրոցներում դահլիճներ տրամադրել, եթե չկա որևէ այլ դահլիճ, և այն էլ՝ բացառապես դասաժամերի ավարտից հետո: Բուհերի դեպքում կուսակցություններն առաջարկել են թույլատրել հանդիպումների անցկացումն ուսանողների հետ՝ մեկնաբանելով, որ գերադասելի է այս կերպ անցկացնել, քան այլ՝ թաքնված ձևերով, չնայած, ըստ Մուկուչյանի, գերադասելի է, որ ուսանողների շրջանում քարոզչություն չլինի:
ԿԸՀ նախագահը բարձրաձայնեց մեկ այլ մտահոգության մասին ևս: «Անհայտ լրատվամիջոցների անհայտ լրագրողներ են հայտնվում՝ իրենց վկայականներով, սրա լուծումը ես չեմ պատկերացնում: Մենք գնացել ենք ծայրաստիճան ազատության: ԿԸՀ-ում հավատարմագրում իրականացնում ենք մեկ նպատակով՝ սահմանափակ տեղերի խնդիր կա. որպեսզի մի լրատվամիջոցից չգան մի շարք ներկայացուցիչներ, և մեկ այլ լրատվամիջոց չզրկվի այդ հնարավորությունից»,- ասաց նա: Մուկուչյանը նշեց, որ ՏԻՄ ընտրությունների ժամանակ ընտրատարածքներում հավատարմագրումներ անցկացնելու խնդիր չի առաջ քաշվել, քանի որ այդ դեպքում ստուգումների, գրանցելու գործընթացը երկար է տևում:
ԿԸՀ նախագահը նշեց, որ առաջարկվել է Քրեական օրենսգրքում փոփոխություններ կատարել՝ սահմանելով հետևյալ կարգը. կաշառք ստացած և ինքնակամ այդ մասին հայտնած անձինք ազատվում են պատասխանատվությունից: Սա, ըստ Մուկուչյանի, խթան է, հարցի լուծման տարբերակ, քանի որ կաշառքը հանցակազմ է, որ երկու կողմ ունի՝ կաշառք տվողն ու ստացողը: Դիտարկմանը, թե ինչ լուծում կարելի է առաջարկել այն դեպքերի համար, երբ հարևանները դուռը թակում են, առաջարկում ընտրել իրենց թեկնածուին: «Անկեղծ, մեր դուռը չեն թակել: Ընդհանրական, բայց հետաքրքիր խնդիր է: Մենք անընդհատ մտածում ենք, որ բացասական երևույթի դեմ պայքարելը յուրաքանչյուրի գործն է, բացի մեզնից: Եթե չենք պայքարել, ուրեմն եկեք չտրտնջանք»,- ասաց նա: Իբրև անկաշառ ընտրության լավագույն օրինակներ՝ նա նշեց, որ եղել են բազմաթիվ դեպքեր, երբ գործող համայնքի ղեկավարը չի ընտրվում:
ԿԸՀ վերահսկիչ-վերստուգիչ ծառայության պետ Սևակ Հովհաննիսյանը նշեց, որ կաշառք հանցակազմը լատենտային հանցագործությունների շարքին է դասվում. այսինքն՝ այն դժվար բացահայտելի է, դրա դեմ մի շարք մեթոդներով են պայքարում: Ըստ Հովհաննիսյանի՝ ավելի հեշտ մեխանիզմ է՝ պարզապես չվերցնել այդ կաշառքը: «Եթե բարձրագոչ հայտարարություններ ենք անում, հետո գնում, կաշառք ենք վերցնում, հետո նորից հանցանք ենք գործում՝ գալիս, հայտարարում ենք այդ մասին: Բանական մարդը դժվար հինգ հազար դրամով գայթակղվի: Կանխարգելման լավագույն միջոցներն ընտրված են, մնացածը մեր՝ յուրաքանչյուրիս խնդիրներն են»,- ասաց նա:
ԿԸՀ քարտուղար Արմեն Սմբատյանը նկատեց՝ ընտրակաշառք հասկացությունը միայն «քեշ» փողի տեսքով չի լինում: Նրա համոզմամբ՝ մինչև չունենանք գիտակից հասարակություն, ոչինչ չի փոխվի: Սևակ Հովհաննիսյանն էլ նշեց մի օրինակ. շատերը խորհուրդ են տալիս՝ կաշառք են առաջարկում, գնացեք, վերցրեք, ընտրեք՝ ում ուզում եք: Նա կարծիք հայտնեց, որ պատասխանատվություն պետք է նախատեսվի նաև այս խորհուրդը տվողների համար:
ԿԸՀ նախագահը, անդրադառնալով սոցիալական ցանցերում քարոզչության իրականացումը վերահսկելու անհրաժեշտությանը, նշեց, որ Facebook-ում իրականացվող քարոզչության սահմանափակման մասին այս պահին խոսելը դեռ վաղ է, քանի դեռ չկան մշակված ընդհանուր մոտեցումներ, ստանդարտներ, և անհասկանալի է՝ ինչպես կարող են կիրառվել այդ սահմանափակումները:
Լուսանկարը՝ Photolure-ի
