Աշխատանքի և սոցիալական հարցերի նախարար Մանե Թանդիլյանը ժամանակին պայքարում էր կենսաթոշակային համակարգի կուտակային բաղադրիչի ներմուծման դեմ: Նախատեսվում է, որ 2018 թվականի հուլիսի 1-ից ուժի մեջ կմտնի կուտակային կենսաթոշակային համակարգի պարտադիր բաղադրիչը:
«Համակարգը կարող էր լինել ավելի լավը և հիմնված մարդկանց կամարտահայտության սկզբունքի վրա, որը որ ձախողել են նախկին իշխանությունները,- «Առաջին լրատվական»- ի հետ զրույցում ասաց Մ. Թանդիլյանը՝ հավելելով, որ հանրությանը պատշաճ չի ներկայացվել այս համակարգի թե՛ դրական, թե՛ բացասական կողմերը, և կա մտահոգություն, որ այն ընկալելի չէ հանրության համար: «Դա է պատճառը, որ օրինագծի գործարկումը հետաձգելու և լրամշակելու նախագիծ է ներկայացվել կառավարություն, որը վերաբերում է պարտադիր բաղադրիչին»,- նշեց նախարարը:
Նրա խոսքով՝ շատ կարևոր է քաղաքացիների վստահությունը վայելելը այս համակարգի ներդրման հարցում. «Եթե դժգոհության աուրայով փորձենք սեղմել, նորից կարող է այնպիսի հաջողություն չլինել, ինչպիսին կուզենայինք ունենալ»:
Դիտարկմանը, թե մտավախություն կա, որ եթե այսօր պատեհ առիթը չօգտագործվի և այս համակարգը չներդրվի, հետագայում հարկեր բարձրացնելու խնդիր կառաջանա, Մ. Թանդիլյանը նշեց, որ դա տեղին մտահոգություն է. «Քննարկումներ են տեղունենում, սա հեշտ գործ չէ, իսկապես լուրջ խնդիր է մեր պետության համար, մարտահրավեր է, պետք է փորձել միասնական լուծում գտնել, անհրաժեշտ է հասարակության և կառավարության փոխըմբռնում:
Կուտակային համակարգի գործարկումը Հայաստանում որոշ դեպքերում կարող է կախված լինել պարտադիր բաղադրիչից: Համակարգի գործարկումը հնարավորություն կտա քաղաքացիներին ապագայի համար ներդրում կատարել, որից կշահեն թե՛ իրենք, թե՛ տնտեսությունը: 4 տարի արդեն գործարկվել է, և 200 000 քաղաքացի համակարգի մասնակից է, չպետք է լինի այնպիսի որոշում, որը կվտանգի քաղաքացիների գումարները, միևնույն ժամանակ խնդիրն այն է, թե արդյոք այդ քաղաքացիները գոհ են, որ իրենք միացել են այդ համակարգին: Քաղաքացին միացել է պարտադրանքով և նա չի դիտարկում, որ կարող է դա անել կամավոր սկզբունքով, քանի որ անվստահության մթնոլորտում է համակարգը ներդրվել: Հանրության հետ կապը ընդհատվել է: Ուզում եմ, որ հանրության հետ երկխոսություն լինի և իրենց կամքի դրսևորումը որևէ կերպ արտացոլվի օրենքի մեջ, և համակարգն էլ լինի այնքան գրավիչ, որ մեր քաղաքացիները գիտակցաբար որոշում կայացնեն և միանան»:
Մանրամասները՝ տեսանյութում:
