Եկել է ժամանակը, որ մշակութային ոլորտի խնդիրները հնչեն ԱԺ ամբիոնից և քննարկվեն խորհրդարանում: Այս մասին «Առաջին լրատվական»- ի հետ զրույցում ասաց ԱԺ «Ելք» խմբակցության պատգամավոր Հրաչ Հակոբյանը: Նա հավելեց, որ չի սահմանափակվի միայն դրանով, բայց հիմնականում մշակութային ոլորտի խնդիրները կբարձրաձայնի:
«Չպետք է անտեսվի մշակույթը: Շատ հաճախ մշակույթն է թելադրում որոշ քաղաքական իրադարձություններ»,- ընդգծեց մեր զրուցակիցը՝ հավելելով, որ քաջատեղյակ է ոլոտի խնդիրներին:
Անդրադառնալով դիտարկմանը, որ պատգամավորը, լինելով մասնագիտությամբ դերասան, այսօր հանդես է եկել սերիալների բովանդակությունը վերանայելու դեմ կոչով, ինչը մի փոքր խուճապ է առաջացրել սերիալներում նկարահանվող դերասանների շրջանում, Հրաչ Հակոբյանը նշեց. «Ես մշակույթի նախարարին հորդորեցի հատուկ ուշադրություն դարձնել և մաքրել հեռուստաեթերը անորակ սերիալներից, դա բնավ չի նշանակում, որ պետք է ընդհանրապես փակվեն սերիալները և անգործ մնան դերասանները, ընդամենը հորդորել եմ, որ ֆիլտրվեն և վերանան այն սերիալները, որոնք պարունակում են գողական ժարգոն, ընտանեկան բռնություն: Դրանց թող փոխարինեն եթե ոչ կրթող, ապա գոնե չդեգրադացնող սերիալներ:
Դերասանը սերիալում բարձր է վարձատրվում, նա պատրաստ է գնալ թատրոն՝ առանց տեքստը սովորելու, դրա հետևանքով տուժում է ներկայացումը, տուժում է հանդիսատեսը… Սերիալների հարցը պետք է լուծել հապշտապ, որովհետև սերունդներ են տուժում դրանից»:
Հ. Հակոբյանի կարծիքով՝ այն, որ անորակ, բռնության տեսարաններով ու գողական ժարգոն պարունակող սերիալների սցենարիստը խրախուսվում և պարգևատրվում էր, դա վերևից պլանավորած քայլ էր, նպատակն այն էր, որ քաղաքացիական գիտակցություն ունեցող հասարակություն հնարավորինս քիչ լինի: Պատգամավորի դիտարկմամբ՝ սերիալների հետևանքով անգամ ազգային անվտանգության խնդիր է առաջանում:
Հակոբյանի դիտարկմամբ՝ հեղափոխությունը ցույց տվեց, որ ոչ մի սերիալ ռեյտինգ չունի, քանի որ հոծ բազմություն էր հավաքվել հրապարակում:
Մանրամասները՝ տեսանյութում:
