Վարչապետ Նիկոլ Փաշինյանը լրագրողների հետ զրույցում ասել է, որ իր պատկերացմամբ՝ արտահերթ ընտրությունը պետք է անցկացնել աշնանը: Նա միաժամանակ ասել է, որ հարցն այդուամենայնիվ պետք է համաձայնեցնել մնացած քաղաքական ուժերի հետ: Խոսքը բնականաբար առաջին հերթին խորհրդարանում ընդգրկված ուժերի մասին է, որոնք պետք է քվեարկեն ընտրական ռեֆորմի վերաբերյալ օրենսդրական նախաձեռնություններին: Ըստ այդմ, ժամկետը նույնպես պետք է համաձայնեցնել նրանց հետ:
Մյուս կողմից՝ ժամկետի հարցում մյուս ուժերն ունեն Նիկոլ Փաշինյանից տրամագծորեն տարբեր մոտիվացիա: Եթե Փաշինյանին անհրաժեշտ է արտահերթ ընտրությունն անցկացնել հնարավորինս արագ, ապա մյուս ուժերին շտապելն անհրաժեշտ չէ՝ թե՛ Ծառուկյանին, թե՛ ՀՅԴ-ին, թե՛ առավել ևս ՀՀԿ-ին: Բանն այն է, որ նրանց նախ՝ ժամանակ է պետք զուտ իրենց բաժնի նախապատրաստության համար, և գլխավորը՝ նրանք ժամանակին կապավինեն Նիկոլ Փաշինյանի վարկանիշի նվազման ակնկալիքով կամ հույսով: Այդ վարկանիշը կնվազի երևի թե աներկբայորեն, բայց խնդիրը այստեղ այն է, թե ինչքան:
Ներկայումս Փաշինյանի վարկանիշը շատ բարձր է, ըստ սոցհարցումների՝ մոտ 80 տոկոս: Եվ դա թերևս բավականին ամուր և, այսպես ասած, բովանդակալից 80 տոկոս է, քան, օրինակ, 2017 թվականի ապրիլին ՀՀԿ վարչապետ Կարեն Կարապետյանի 86 տոկոսը: Այսինքն՝ Նիկոլ Փաշինյանի վարկանիշի նվազումը պետք է տեղի ունենա առնվազն երկու բաղադրիչով՝ բովանդակության և զուտ թվաբանության կամ տոկոսային առումով: Հետևաբար սա բավականին ամուր վարկանիշ է և, այսպես ասած, հեշտ նվազողներից չէ: Բայց հենց այդ պատճառով էլ քաղաքական մյուս ուժերը, որոնք միանգամայն բնական, օբյեկտիվ, հասկանալի պատճառներով արդեն իսկ դիտարկվում են նրան մրցակից, և իրենք էլ դիտարկում են իրավիճակը այդ տեսանկյունից, չեն շտապի արտահերթ ընտրության ժամկետի հարցում: Համենայնդեպս, առայժմ չկա մոտիվացիա կամ պատճառ, որը նրանց կշտապեցնի:
Ըստ այդմ՝ դա խոշոր հաշվով դառնում է Նիկոլ Փաշինյանի կամ թավշյա հեղափոխության քաղաքական օրակարգային առաջնահերթություն՝ ձևավորել մյուս քաղաքական ուժերի մոտիվացիա կամ պատճառ, որը նրանց կբերի ոչ միայն ընտրական ռեֆորմի շուրջ արդյունավետության, այլ նաև արտահերթ ընտրության ժամկետի հարցում արագության: Դա հնարավոր է անել տեսականորեն երկու տարբերակով՝ ճնշման կամ համոզելու, փոխհամաձայնության: Կամ երկու տարբերակի համադրությամբ, երբ մեկի տեսական հնարավորությունը կարող է օգնել մյուսի գործնական արդյունք արձանագրելուն:
Մասնավորապես, հանրային ճնշման գործոնը կարող է բերել նրան, որ խորհրդարանում ներկայացված ուժերը կհասկանան ժամանակ ձգելու աննպատակահարմարությունը, գիտակցելով, որ ժամանակը կմաշի հենց իրենց վարկանիշը, ոչ թե Նիկոլ Փաշինյանի: Այդ դեպքում նրանք կգիտակցեն, որ այն, ինչ կարող էին ստանալ աշնանը, չեն ստանա, ասենք, գարնանը կամ՝ ավելի ուշ:
Այստեղ իհարկե շատ կարևոր է, թե ինչպես կհարաբերվի հանրության հետ Նիկոլ Փաշինյանը: Սխալ է խնդիրը կապել զուտ սոցիալական արդյունքին՝ հանրությունը ստանո՞ւմ է ինչ-որ նյութական հագեցում, թե՞ ոչ: Իհարկե, դա շատ կարևոր է, որովհետև մարդիկ ի վերջո օբյեկտիվորեն հեղափոխություն են անում լավ կյանքի համար: Մյուս կողմից, սակայն, հեղափոխությունը կարող է արվել դրա հիմքով, սակայն չի կարող պահվել ու պահպանվել այդ հիմքի վրա: Հետևաբար ներկայումս նոր կառավարությունը, առօրյա սոցիալ-տնտեսական խնդիրների առնչությամբ հանրությանը ազդակներ հղելով՝ տուգանքների համաներման հնարավորության, վարկերի հարցում օժանդակության հնարավորությունների քննարկման, ճանապարհային երթևեկության հարցում տուգանումների սահմանափակման և այլ հարցերով, պետք է հանրության հետ ունենա նաև հիմնարար երկխոսություն նոր հեռանկարների և խորքային օրակարգերի ձևավորման մասով:
Այստեղ թերևս միանգամայն օրինակելի վիճակ է կրթության ու գիտության ոլորտում, որտեղ նոր նախարարի շուրջն արդեն իսկ ձևավորվել է հանրային օրակարգային մշակումների բավականին պրոֆեսիոնալ միջավայր, ինչը անկասկած առավել ամրացնւմ է նոր նախարարին: Կա խնդիր ձևավորելու այդօրինակ միջավայրեր մյուս, հնարավորինս շատ ոլորտներում և ամբողջապես կառավարության շուրջը՝ իրավիճակը և հետագա զարգացումները կտրելով միայն սոցիալ-տնտեսական հագեցածության, խոշոր հաշվով, բավականին անկայուն թելից: Դրա հանրային ռեսուրսն առկա է, մնում է լինի կառավարության քայլը, և հանրության հետ երկխոսության նոր շերտի ձևավորումը թերևս բավականին ամուր բուֆեր կլինի Փաշինյանի և թավշյա հեղափոխության հեռանկարի համար:
Տեսնելով, որ ժամանակը իրականում չի աշխատում նրա դեմ, այլ հակառակը՝ աշխատում է ընդդեմ իրենց, քաղաքական մյուս ուժերը ստիպված կլինեն գնալ արագ համաձայնության, քանի որ արդեն նրանց խնդիրը կլինի ոչ միայն մեծ վարկանիշ ունեցող սուբյեկտ Նիկոլ Փաշինյանն ու նրա քաղաքական միավորը, այլ բավական պրոֆեսիոնալ սպասարկում ունեցող հանրային օրակարգը:
