Հունաստանի պաշտպանության նախկին նախարար Ակիս Ցոխաձոպուլոսի կինը՝ Վիկի Ստամատին, ով 12 տարվա ազատազրկման է դատապարտվել ամուսնու ֆինանսական հանցագործությունների գործով, փորձել է բանտում ինքնասպան լինել: Նրան հոսպիտալացրել են: Այս մասին հայտնում է Capital.gr կայքը՝ հղում անելով փաստաբանին:
Նախկին նախարարի կինը պատիժ է կրում Աթենքի արվարձանի խիստ ռեժիմի «Կորիդալոս» բանտում: Նրա փաստաբանի խոսքով՝ տիկինը քնաբերի մեծ քանակություն է ընդունել այն բանից հետո, երբ նրան հայտնել են բանտի կանանց բաժանմունքից Թեբե քաղաքի կանանց բանտ տեղափոխելու մասին:
Հայտարարության մեջ նշվում է, որ նախկին նախարարի կինը տևական ժամանակ բուժվել է հոգեբուժական կլինիկայում՝ կապված ինքնասպանության համախտանիշով ուղեկցվող լուրջ ընկճախտի հետ:
Փաստաբաններն անարդար են համարում դատավճիռը և կոչ են անում վերանայել այն՝ հայտարարելով, որ նախկին նախարարի կինը խիստ պատիժ է կրում ամուսնու ֆինանսական հանցագործություննրի համար, մինչդեռ լուրջ քրեական հանցագործությունների մեջ մեղադրվող հարյուրավոր մարդիկ ազատության մեջ սպասում են վերաքննիչի որոշմանը:
Նախկին նախարարի դեմ դատը տևել է ապրիլից հոկտեմբեր: Նա մեղավոր է ճանաչվել մեղադրական բոլոր կետերով՝ ներառյալ կաշառակերության և հանցավոր ճանապարհով ստացած փողերի լվացումը: Դատարանը վճռել էր, որ նախկին նախարարը և ևս 16 ամբաստանյալներ անօրինական ճանապարհով ստացել են առնվազն 55 մլն եվրո կաշառք՝ 1997-2001թթ. ռուսական TOR-M1 ՀՕՊ համակարգերի և գերմանական սուզանավերի գնման պայմանագրերի կնքման ժամանակ:
11 ամբաստանյալների վճռի կատարումը հետաձգվել է: Անձամբ 75-ամյա Ցոխաձոպուլոսը դատապարտվել է 20 տարվա ազատազրկման, իսկ նրա կինն ու դուստրը՝ 12 տարվա: Դատարանը նաև առգրավել է նրա գույքն ու պարտավորեցրել 1 մլն եվրոյի տուգանք վճարել: Ավելի վաղ Ցոխաձոպուլոսը 8 տարվա ազատազրկման էր դատապարտվել հարկային սխալ հաշվետվություն ներկայացնելու համար:
