«Հունիսին՝ Իրանի նախագահական ընտրություններից հետո, նորընտիր նախագահը որդեգրեց նոր դիրքորոշում, որը տարբերվում էր նախորդ նախագահների դիրքորոշումից: Դրանք թափանցիկ կերպով բոլորի համար ներկայացրել ենք: Պարզ է, որ մինչև ընտրվելը Իրանի և արևմտյան երկրների միջև լարվածություն կար, իսկ նախագահը համարեց, որ պետք է եվրոպակա և արևմտյան երկրների հետ լարվածությունը նվազեցվի»,- այսօր լրագրողների հետ հանդիպմանը ասաց Հայաստանում Իրանի արտակարգ և լիազոր դեսպան Մուհամմադ Ռեիսին:
Նա նշեց, որ իրենք դեմ են միջուկային զենքի արտադրությանը քաղաքական և ռազմավարական տեսանկյունից: Դեսպանի հավաստմամբ` միջուկային զենքը որևէ երկրի անվտանգությունը չի կարող ապահովել. «Այս բոլորի հիման վրա էլ Ժնևում տեղի ունեցան բանակցություններ, և որոշակի պայմանավորվածության եկան. այդ համաձայնությունները կոչվել են համատեղ քայլեր: Հիմնական նպատակը վստահության ստեղծումն է, ինչպես նաև խաղաղ նպատակներով միջուկային ծրագրի զարգացման Իրանի իրավունքի ճանաչումը»:
Դեսպանի հավաստմամբ՝ Իրանի ժողովուրդն ընդհանուր առմամբ արևմտյան պետություններին չի վստահում, քանի որ զգացվում են Արևմուտքի երկակի ստանդարտները: Իրանի ժողովուրդը կարծում է, որ պատժամիջոցների պատասխանատուն արևմտյան երկրներ են, իսկ, ինչպես հայտնի է, այդ պատժամիջոցները հենց անմիջապես ժողովրդի վրա են ազդում:
Դեսպանն անդրադարձավ նաև Մաքսային միությանը Իրանի հնարավոր մասնակցությանը և ասաց. «Մաքսային միության վերաբերյալ ամբողոջովին ներկայացված չեն ծրագրերը, մենք չգիտենք, թե դա իրենից ինչ է ներկայացնում: Երբ մենք կունենանք տեղեկություններ՝ կանոնադրությունների և կանոնների մասին, կուսումնասիրենք:
Խոսելով հայ-իրանական հարաբերությունների մասին՝ դեսպանն ընդգծեց, որ իրենք Հայաստանի հետ ունեն շատ լավ հարաբերություններ. «Հայաստանի էներգետիկայի նախարար Արմեն Մովսիսյանի՝ Թեհրան կատարած այցի ժամանակ հանդիպում է եղել նախկին նախարարի հետ և քննարկվել գազ՝ էլեկտրաէներգիայի դիմաց համաձայնագիրը, և մենք տարիներ առաջ ձեռք բերած համաձայնագրին հավատարիմ ենք, գների մեջ փոփոխություններ են եղել, բայց մենք հավատարիմ ենք մնում այն համաձայնագրին, որ ձեռք է բերվել:
Դեսպանը հավելեց, որ գումարով Հայաստանին գազ մատակարարելու մասին առայժմ խոսք չկա, ՀՀ իշխանությունների հետ էլ չի քննարկվել. «Մենք բարեկամ երկրների հետ այլ կերպ ենք վարվում, իսկ ընդհանրապես միջազգային գներով ենք առաջնորդվում»,- բազմաթիվ հարցերին ի պատասխան՝ ասաց նա:
Նրա խոսքով՝ եթե անհրաժեշտ լինի, որ Իրանն ապահովի Հայաստանի գազի սպառման ծավալները, ուրեմն անհրաժեշտ կլինի ստեղծել ենթակառուցվածք. «Պետք է նախ հստակեցնել, թե ռուսական գազի գինն ինչքան է, իրանականն՝ ինչքան, հետո պարզ կդառնա՝ կարո՞ղ ենք մրցակցել, թե՞ ոչ: Պետք է բանակցել, քննարկել, բայց մի բան հստակ է՝ մի երկրին գազը կարող է մատակարարվել մի գնով, մյուսին` այլ:
Իրանը Թուրքիային և այլ երկրների գազը վաճառում է գործող միջազգային գներով, իսկ բարեկամ երկրներին՝ այլ գներով: Պարզ չէ՝ հիմա ո՞րն է ավելի թանկ, գործարքը կնքելու պահին կերևա»:
Իսրայելի պաշտոնական արձագանքին, թե Իրանը ցանկանում է սեպ խրել հայ-ռուսական հարաբերություններում, դեսպանն ասաց. «Իսրայելը քսան տարի է՝ Իրանի մասին ստեր է խոսում, Իսրայելի գոյությունը հիմնված է լարվածության ստեղծման վրա: Մենք կարևորում և հարգում ենք երկու երկրներն էլ, մեզ համար լավ կլինի, որ Հայաստանը ուժեղ երկիր լինի»:
Լուսանկարը` PanARMENIAN Photo-ի
