Ադրբեջանական Vesti.az կայքի փոխանցմամբ՝ թուրքական կառավարության աղբյուրները հայտնում են, որ Թուրքիան կարող է հրաժարվել դեպի Գազայի հատված «Ազատության նավատորմ 2»-ի առաքման գաղափարից։ Դա կարող է հանգեցնել երկու երկրների փոխհարաբերությունների կարգավորմանը։
Սիրիայում և Մերձավոր Արևելքի այլ երկրներում իրավիճակի սրումից հետո Իսրայելն ու Թուրքիան սկսել են բանակցություններ վարել, որոնք կարող են վերջ դնել երկու երկրների միջև ստեղծված տևական ճգնաժամին։
Այդ բանակցություններում իսրայելական կողմը ներկայացնում է Թուրքիայում Իսրայելի դեսպան Գաբի Լևին, իսկ թուրքական կողմը՝ արտգործնախարության մի շարք բարձրաստիճան պաշտոնյաներ։
Առավել վաղ Իսրայելի վարչապետ Բենիամին Նեթանյահուն նամակ էր հղել Թուրքիայի վարչապետ Էրդողանին՝ շնորհավորելով նրան ընտրություններում տարած հաղթանակի կապակցությամբ։ Նեթանյահուն հունիսի 12-ին Թուրքիայում կայացած խորհրդարանական ընտրությունները որակել էր որպես թուրք ժողովրդի ժողովրդավարական ընտրություն։
Հիշեցնենք, որ «Ազատության նավատորմ-2»-ը դեպի Գազայի հատված է մեկնելու հունիսի վերջին։ Հունիսի 27-ին Կիպրոսում պետք է հավաքվեն դրա կազմի մեջ մտնող բոլոր նավերը, որից հետո դրանք կուղևորվեն Գազայի հատված։
Ուշագրավ է, որ այժմ Իսրայելը մտադիր է սեփական «Ազատության նավատորմ» ուղարկել Թուրքիայի հարավ-արևելյան հատվածում գտնվող սիրիացի փախստականներին և դրա թույլտվության համար դիմել էր Էրդողանին, ինչը թուրքական լրատվամիջոցները որակել էին որպես ծաղրանք։