ՀՅԴ Նիկոլ Աղբալյան ուսանողական միության ատենապետ Գերասիմ Վարդանյանն այսօր լրագրողների հետ հանդիպման ժամանակ խոսելով կուտակային կենսաթոշակների դեմ պայքարողների մասին՝ ասաց, որ նրանց թիվը սկզբում փոքր էր, սակայն ժամ առ ժամ մեծանում է:
Նա նկատեց, որ պայքարողների մեծ մասը երիտասարդներն են, սակայն ցավալի է, որ ուսանողների թիվը դեռևս այնքան մեծ չէ: Ինչ վերաբերում է ուսխորհուրդներին, ապա դրանք ՀՀԿ-ի շահերի պաշտպան են ներկայանում:
Բանախոսն ասաց, որ այդ օրենքով ստաժ չեն համարվում զինծառայության երկու տարիները, ուսումնառության չորս տարիները, ֆիզարձակուրդ գնացած կանանց տարիները: «Մենք կոչ ենք անում ուսանողական կազմակերպություններին՝ միանալ պայքարին. սա բոլորիս խնդիրն է: Ուղղակի բողոքելով և տանը նստելով՝ ոչ մի հարց չի լուծվում»,- ասաց նա:
Գ. Վարդանյանը նշեց նաև, որ պայքարողների թիվն արդեն 6 հազարից անցնում է: Երեկ ակտիվիստների ճնշմամբ իրենց է միացել նաև Մարդու իրավունքների պաշտպանի գրասենյակը:
Ասուլիսի մյուս բանախոս՝ ակտիվիստ Դավիթ Խաժակյանն էլ հավելեց, որ երեկ ավելի քան 4 հազար ստորագրությամբ նամակ է հանձնվել նախագահին: Խնդիրը ԱԺ-ում չլուծվեց, սակայն ակցիաների միջոցով կփորձեն հասնել դրա լուծմանը:
Լուսանկարը` PanARMENIAN Photo-ի
