2013 թ-ին լրանում է լեգենդար երգչուհի Մարիա Կալասի ծննդյան հոբելյանական 90-ամյակը: Այդ առիթով ամբողջ աշխարհում այս տարվա ընթացքում տեղի են ունեցել Կալասին նվիրված միջոցառումներ:
«Ուրախ ենք նշել, որ Հայաստանը նույնպես առիթ կունենա դեկտեմբերի 8-ին տոնական միջոցառումով նշելու Մարիա Կալասի ծննդյան հոբելյանական տարին և այդ առիթով շնորհակալություն ենք հայտնում Հայաստանում Հունաստանի Հանրապետության դեսպանությանը համերգի իրականացման և աջակցման գործում: Շվեյցարիայից Երևան կժամանի ճանաչված երգչուհի Վարդուհի Խաչատրյանը, ով կատարելու է Կալասի երգացանկի հանրահայտ օպերային արիաներ: Այս տարվա ընթացքում Վարդուհի Խաչատրյանը բեմել է աշխարհի տարբեր երկրներում տեղի ունեցող Մարիա Կալասին նվիրված հոբելյանական համերգներին և փառատոններին և առաջիկա համերգով իր շրջագայությունը կեզրափակի իր հայրենի քաղաքում` Երևանում: Այդ երեկո Վարդուհի Խաչատրյանին կնվագակցի ՀՀ վաստակավոր արտիստ Հայկ Մելիքյանը, ով մի քանի տարի է, ինչ բացառապես համագործակցում է Վարդուհի Խաչատրյանի հետ` որպես երգչուհի-մենակատար»,- ասում է երաժշտական մենեջեր, միջոցառման համակարգող Ալեքսանդր Հակոբյանը:
Վարդուհի Խաչատրյանը բազմաթիվ միջազգային մրցույթների դափնեկիր է, որոնց թվում է նաև 2001 թ. Աթենքում տեղի ունեցած Մարիա Կալասի անվան միջազգային մրցույթը, որտեղ Երգչուհին արժանացել է Գրան Պրի մրցանակի: Նա երգել է բազմաթիվ հեղինակավոր այնպիսի փառատոններում, ինչպիսիք են «Festival Castell de Peralada» (Իսպանիա), «Musicastello» և «Festival Euro Mediterraneo» (Իտալիա), «Festival Flaneries Musicales d’Eté in Reims» և «Festival d’Ambronay» (Ֆրանսիա) փառատոններին, երգել է այնպիսի աշխարհահռչակ երգիչների հետ, ինչպիսիք են Մոնսերատ Կաբալիեն, Խոսե Կուրան, Անգելա Ջորջուն և այլք: Վարդուհի Խաչատրյանը շրջագայում է աշխարհի հեղինակավոր սրահներով` այնպիսիք, ինչպիսիք են Լոնդոնի Ropyal Albert Hall-ը, Փարիզի Salle Gaveau-ն, Ժնևի Victoria Hall-ը, Մոնթրյոի Auditorium Stravinsky-ն և այլն: Նրա կատարումները հեռարձակվել են տարբեր երկրների ռադիո և հեռուստաալիքներով, այդ թվում նաև դասական երաժշտության հանրահայտ ֆրանսիական MEZZO հեռուստաալիքով և գերմանական KLASSISCH հեռուստածրագրով:
Հիշեցնենք, որ համերգը տեղի կունենա 2013 թ. դեկտեմբերի 8-ին, ժամը` 19:30, Կոմիտասի անվան կամերային տանը:
