Հայաստանի զինվորական շրջանակներից «Ազատությանը» հայտնի է դարձել, որ լեհական ընկերություններից մեկը արդիականացնում է Հայաստանի զինված ուժերի Т-72 տեսակի տանկերը: Քանակությունն անհայտ է, որևէ տեղեկություն չի հաղորդվում նաև արդիականացված տանկերի տեխնիկական տվյալներր վերաբերյալ:
Պաշտպանության նախարարի մամուլի քարտուղար Արծրուն Հովհաննիսյանը «Ազատության» հետ զրույցում ո՛չ հաստատել է, ո՛չ էլ հերքել այս տեղեկությունը՝ նշելով. – «Նման տեղեկություն չենք տրամադրում մամուլին, թե սպառազինության ի՞նչ քանակ, տեսակ և որտե՞ղ ենք կատարելագործում: Հայաստանի պաշտպանության նախարարության սպառազինության կատարելագործումը շարունակական գործ է և հանդիսանում է մեր աշխատանքի գերակա ուղղություններից մեկը»:
Հայկական տանկերի արդիականացման մասին տեղեկությունը առաջինը օրերս հրապարակել է Մոսկվայում գործող հեղինակավոր՝ «Սպառազինության համաշխարհային առևտրի վերլուծության կենտրոնը» (Центр анализа мировой торговли оружием), որը հայտնի է Ռուսաստանի պաշտպանության նախարարության, ռազմական հետախուզության հետ ունեցած կապերով:
Ըստ կենտրոնի` լեհական «Բումար լաբեդի» (Bumar Łabędy) ընկերությունում ընթանում է հայկական զինված ուժերի Т-72 տեսակի թվով 84 տանկերի արդիականացումը, և աշխատանքների ավարտից հետո հայկական Т-72-ները կդառնան լեհական PT-72U կարգի տանկեր: Ըստ աղբյուրի` գործարքի ընդհանուր գումարը կազմում է մոտ 100 միլիոն ԱՄՆ դոլար: Տանկերի արդիականացումը պետք է ավարատվի 2015 թվականին, սակայն առաջին արդիականացված խմբաքանակը պատրաստ կլինի մինչև տարեվերջ:
«Բումար լաբեդի»-ն լեհական ռազմաարդյունաբերության ոլորտի հնագույն ձեռնարկություններից է: Սպառազինության արտադրությամբ զբաղվում է 1938 թվականից:
Razm.Info-ի մեկնաբան Գարիկ Հարությունյանի ներկայացմամբ` արդիականացումից հետո հայկական տանկերը իրենց հզորությամբ հավասարվում են ռուսական արտադրության Т-90 տանկերին:
« PT-72-ի դեպքում ավելացված է, օրինակ, դինամիկ զրահ, արդիականացվել է շարժիչը` դրվել է նոր շարժիչ, փոխվել են նաև կապի սարքավորումները: Փոխվել են դիտման սարքերը, տեղադրվել են տեսախցիկներ: Եվս մի քանի սարքեր են տեղադրվել: Կրակի կառավարման համակարգը նույնպես փոխվել է», – որոշ մանրամասներ ներկայացրել է Հարությունյանը:
Համեմատությունը Т-90 տանկերի հետ պատահական չէ: Այս ամռանը հայտնի դարձավ, որ ՀԱՊԿ գծով Հայաստանի դաշնակիցը համարվող Ռուսաստանը մոտ 4 միլիարդ դոլարի սպառազինության վաճառքի պայմանագրեր ունի Ադրբեջանի հետ և այդ շրջանակում Բաքվին արդեն իսկ մատակարարել է հարձակողական նշանակության մեծաքանակ զինտեխնիկա, այդ թվում՝ 94 միավոր Т-90С տեսակի տանկեր:
Բազմաթիվ դիտորդների համոզմամբ` ռուսական կողմի այդ մատակարարումները որպես Երևանի նկատմամբ ճնշամիջոց իրենց դերն ունեցան, ու Հայաստանը նաև այդ պատճառով ստիպված եղավ հրաժարվել Եվրամիության հետ Ասոցացման համաձայնագրի նախաստորագրումից և որոշում կայացրեց անդամակցել Ռուսաստանի նախաձեռնությամբ ստեղծված Մաքսյաին միութանը:
Ուշագրավ է, որ Հայաստանը տանկերի արդիականացման պայմանագիր է կնքում ՆԱՏՕ-ի անդամ Լեհաստանի հետ: Ուշադրություն է գրավում ոչ միայն պայմանագրի բնույթը, այլև ծավալը՝ 100 միլիոն ԱՄՆ դոլար:
Այս կապակցությամբ հիշեցնենք, որ ռազմաարդյունաբերության ոլորոտում համագործակցության վերաբերյալ նախորդ ամիսներին Հայաստանը պայմանավորվածություններ ձեռք բերեց նաև ՆԱՏՕ-ի անդամ այլ երկրների` Միացյալ Նահանգների, Իտալիայի և Հունաստանի հետ:
Մանրամասները՝ «Ազատություն» ռադիոկայանի կայքէջում
