Իմ կառավարությունը տեխնոկրատների կառավարություն էր, իսկ հիմա լրիվ այլ է, հիմա երիտասարդ են, ճիշտ է, բայց քաղաքական թիմ են, առնվազն կորիզի առումով։ Այդ մասին «Առաջին լրատվական»-ի հետ զրույցում նշեց ՀՀ նախկին վարչապետ, Հայ-ռուսական (սլավոնական) համալսարանի ռեկտոր Արմեն Դարբինյանը։
«Ես սա կկոչեի քաղաքական նոր թիմի կառավարություն, որում, այո, երիտասարդները գերիշխող դեր են ստանձնել։ Երիտասարդությունը շատ դրական է ավյունի, մոտեցումների, թարմության տեսանկյունից, անկաշառ են, պայքարող տեսակ են, քաղաքացի են, ունեն հստակ իրենց թիմային քաղաքական դիրքորոշումը։ Այդ ամենը լավ է ու բնական է, որ քաղաքական թիմը, որ կարողացավ իր վրա վերցնել հեղափոխական այս պրոցեսների կառավարումը, եկել է իշխանության և այդ թիմի առանցքային անդամները պետք է գրավեին նաև կառավարության առանցքային դիրքերը»,- ասաց Դարբինյանը։
Ինչ վերաբերում է տնտեսական բլոկի նախարարություններին, նա նկատեց, որ այդ բլոկում մեծ փոփոխություններ տեղի չեն ունեցել։ «Որևէ նոր բան ակնկալել, կարծում եմ՝ ճիշտ չէր լինի, որովհետև պետք է հաշվի առնել, որ կառավարությունը ժամանակավոր է, գոնե մինչև այսօր այդպես է հայտարարված։ Այս պարագայում տնտեսական կամ ֆինանսական բլոկի որևէ էական փոփոխություն պետք չէ սպասել, և դա ճիշտ չէր լինի։ Նոր տնտեսական մոդելի քննարկումները պետք է ընթանան միայն ընտրություններից հետո։ Ֆինանսների նախարար Ատոմ Ջանջուղազյանը շատ նորմալ, պրոֆեսիոնալ անձնավորություն է և միայն կարելի է ողջունել։ Մենք ունենք էկոնոմիկայի նախարար Արծվիկ Մինասյանին, որը նախկինում էլ եղել է այդ պաշտոնում, նոր մարդ չէ։ Այնպես որ, որևէ նոր բան ակնկալել պետք չէ։ Մենք պետք է տնտեսական իրավիճակը կայուն պահենք մինչև նոր ընտրություններ։
Հարցին, թե որն է այն ողջամիտ ժամկետը, երբ պետք է տեղի ունենան արտահերթ ընտրություններ՝ հաշվի առնելով, որ ԱԺ-ում մեծամասնություն կազմող ՀՀԿ-ն չի շտապում այդ հարցում և կարծես դեմ է արտահերթ ընտրություններին և Ընտրական օրենսգրքի փոփոխություններին, Արմեն Դարբինյանը պատասխանեց. «Ընտրությունների վերաբերյալ պետք է խոսել քաղաքական նպատակահարմարությունից ելնելով, խոսել, թե դա քաղաքական թիմերի համար որքանով է նպատակահարմար ավելի վաղ կամ ավելի ուշ անցկացնել։ Պետք է հասկանալ, որ շահերը տարբեր են։ Կան քաղաքական թիմերի շահեր, և կա երկրի շահը։ Երկրի շահը միանշանակ թելադրում է, որ արտահերթ ընտրությունները տեղի ունենան, որովհետև մենք, վերջիվերջո, պետք է ունենանք սոցիալական ու քաղաքացիական պատկերն արտացոլող խորհրդարան, որին քաղաքացիները կվստահեն։ Մենք այսօր չունենք այդպիսի խորհրդարան։ Բայց մի դեպքում դա պետք է լինի, եթե այն քաղաքական ուժը, որը վերցրել է իր վրա երաշխավորելու այդ ընտրությունների թափանցիկությունն ու արդարությունը, կարողանա դա իրականացնել։