Արդեն 4-րդ տարին անընդմեջ «Ամերիա» ընկերությունների խումբը բարեգործական աճուրդ է կազմակերպում՝ ծանր հիվանդություն ունեցող մանուկների կյանքը փրկելու համար: Այս մասին այսօր լրագրողների հետ հանդիպման ժամանակ ասաց «Ամերիա» ընկերությունների խմբի զարգացման տնօրեն Տիգրան Ջրբաշյանը:
Նրա խոսքով՝ անցյալ տարի, դեկտեմբերի 11-ին, կայացել էր 3-րդ բարեգործական աճուրդը, որի ընթացքում հավաքվել էր մոտ 35.5 մլն դրամ, և որն «Ամերիան» կրկնապատկել է՝ դարձնելով 71 մլն դրամ: «Բացի դրանից՝ 1 ամսվա ընթացքում եղան ևս 8 մլն դրամի հանգանակություններ, արդյունքում աճուրդի շրջանակներում հավաքվեց ավելի քան 79 մլն դրամ, որն ուղղվեց հիվանդ երեխաների բուժմանը»,- ասաց Տ. Ջրբաշյանը՝ հավելելով, որ այս տարվա ընթացքում «Ամերիա» ընկերությունների խմբի կողմից հիվանդ երեխաների բուժման համար արդեն փոխանցվել է շուրջ 21 մլն դրամ, որից 1մլն դրամը Ամերիայի աշխատակիցների նվիրատվություններն են: Ընդհանուր առմամբ 1 տարվա ընթավքում` 2012թ. դեկտեմբերից մինչև 2013թ. դեկտեմբեր շուրջ 100 մլն դրամ է փոխանցվել երեխաների բուժման համար:
««Երեխաներ առանց ցավի» հիմնադրամի հետ մենք օգնեցինք 5 երեխայի՝ իդեոպատիկ արտրիդի հետ կապված խնդիրներով, ընդհանուր առմամբ ծախսվեց մոտ 13 մլն դրամ»,- ասաց Ջրբաշյանը՝ հավելելով, որ այդ 5 երեխաներից 2-ը արդեն ապաքինվել են:
«Նվիրիր կյանք» հիմնադրամի հետ համատեղ օնկոլոգիական խնդիրներ ունեցող 6 երեխայի համար հատկացվել է մոտ 33 մլն դրամ: «Մի քանիսը այդ գումարներով տեղափոխվեցին Գերմանիա՝ վիրահատվելու: Ցավոք, եղան երեխաներ, որոնց չհաջողվեց փրկել: Առնվազն 3 երեխայի համար, սակայն, այդ օժանդակությունը եղավ վճռորոշ: «Օգնեմ» հիմնադրամի հետ 6 երեխայի փորձեցինք ապահովել անհրաժեշտ՝ Հայաստանում չգրանցված դեղամիջոցներով՝ 10 մլն 383 հազար դրամ արժողությամբ»,- ասաց Տ. Ջրբաշյանը:
«Ամերիա» ընկերությունների խումբը աշխատել է նաև «Օգնենք հայ մանուկներին» բարեգործական հիմնադրամի (3 մլն 678 հազար դրամ) հետ: Տարբեր այլ հիմնադրամների միջոցով երեխաների բուժման նպատակով ծախսվել է ևս 9 մլն դրամ:
Տարվա ընթացքում հավաքված մոտ 21 մլն դրամը դարձյալ ծախսվել է տարբեր բարեգործական հիմնադրամների միջոցներով, որոնց վերաբերյալ ամբողջական հաշվետվությունները պատրաստ են:
