Երեկ Երևանում բողոքի ակցիաներ անցկացնելիս ոստիկանության տարբեր բաժիններ բերման ենթարկված բոլոր 110 անձինք ազատ են արձակվել:
Ռուսաստանի նախագահ Վլադիմիր Պուտինի այցի օրը Հայաստանի ինքնիշխանության մասին իրենց քաղաքացիական դիրքորոշումը հայտնած 109 անձանց դեպքում տարբեր վարչական իրավախախտումների մասին արձանագրություններ են կազմվել, որոնք տուգանքներ է ենթադրում: Քաղաքացիներից մեկն, ըստ պաշտոնական հաղորդագրության, անչափահաս է:
Ոստիկանությունն այսօր հայտարարել է, թե 43 անձի նկատմամբ կազմվել է վարչական իրավախախտման արձանագրություն` «ոստիկանի օրինական պահանջին չենթարկվելու» համար, որը նախատեսում է տուգանք` 50 հազար դրամի չափով: 62 քաղաքացի պետք է տուգանվի 50-ից 100 հազար դրամի չափով՝ «հավաքի խաղաղ և բնականոն ընթացքի ապահովման վերաբերյալ ոստիկանության` պահանջները չկատարելու» համար: Մեկ քաղաքացու, ըստ ոստիկանության հայտարարության, սպառնում է թե՛ «ոստիկանին չենթարկվելու համար» 50 հազար դրամի չափով տուգանք, և թե՛ «հավաքի մասնակցի՝ օրենքով սահմանված պարտականությունները չկատարելու» համար` 50-ից 200 հազար դրամի տուգանք: Երեք քաղաքացու էլ սպառնում է տուգանք՝ 20-ից 60 հազար դրամի չափով՝ «հասարակական վայրերն օգտագործելու կանոնները խախտելու» համար: Վերոհիշյալ քաղաքացիները գետնանցման պատին փակցրել էին «Ինքնիշխան Հայաստանի Հանրապետություն» վերտառությամբ պաստառը՝ Սահմանադրության առաջին հոդվածի ձևակերպմամբ:
«Ազատություն» ռադիոկայանի փոխանցմամբ՝ ոստիկանությունը տուգանքների մասին արձանագրությունները դեռ պետք է ուղարկի Վարչական դատարան:
«Երեկվա տեղի ունեցածը նման է և՛ բովանդակությամբ, և՛ առարկայով, 2011 թվականի սեպտեմբերի 21-ին ինձ ոստիկանություն՝ էլի Կենտրոն բաժին բերման ենթարկելու դեպքի հետ, երբ երթի էինք պատրաստվում ելնել ընդդեմ ռուսական զորքի և օտար դրոշների մասնակցության՝ մեր անկախության շքերթին: Ինձ և էլի մեկ հոգու բերման ենթարկեցին ոստիկանություն: Առանց որևէ հիմքի դատարանը որոշեց, որ ոստիկանությունը իսկապես խախտել է այդ երեք հիմնարար սահմանադրական իրավունքները: Ի՞նչ էինք արել մենք՝ եռագույնն էինք պարզել և գոչել էինք՝ ազատ, անկախ Հայաստան», – «Ազատություն» ռադիոկայանի հետ զրույցում մեկնաբանել է երեկ բերման ենթարկվածներից՝ ժուռնալիստների «Ասպարեզ» ակումբի խորհրդի նախագահ Լևոն Բարսեղյանը:
Մանրամասները՝ «Ազատություն» ռադիոկայանի կայքէջում
