ԱԺ ՀԱԿ խմբակցության ղեկավար Լևոն Զուրաբյանը դեկտեմբերի 3-ին ԱԺ հայտարարությունների ժամին անդրադարձավ նախօրեին ոստիկանություն բերման ենթարկված ակտիվիստներին և նշեց, որ դեկտեմբերի 2-ին 110 քաղաքացիներ բերման են ենթարկվել ոստիկանության բաժանմունքներ: Նրա խոսքով՝ խաղաղ ցույցերի մասնակից քաղաքացիներից զատ, նրանց մեջ կային նաև լրագրողներ, անչափահասներ կամ պարզապես փողոցներից,կանգառներից պատահական մարդիկ:
«Կատարվել են խուզարկություններ, ոմանց նկատմամբ կիրառվել են բռնություններ, բերման ենթարկվածները ապօրինաբար զրկված են եղել փաստաբանական օգնության հնարավորությունից, շատերն ամբողջ օրվա ընթացքում պահվել են ոստիկանական բաժանմունքներում առանց իրավական հիմքի՝ օրենքի լկտի խախտումներով: Այս գործողությունները չեն տեղավորվում ՌԴ նախագահի այցի անվտանգության ապահովման միջոցառումների շրջանակներում, քանի որ եղել են և՛ ապօրինի, և՛ այցի բնականոն ընթացքի ապահովմանը անհամաչափ»,- ասաց նա:
Զուրաբյանը նշեց, որ խաղաղ ցուցարարների դեմ ոստիկանության գործողություններով խախտվել է քաղաքացիների՝ հավաքների ազատության սահմանադրական իրավունքը, հասարակական կարգը: Պատգամավորն ասաց, որ ակնհայտ է՝ խաղաղ ցուցարարների դեմ բռնություն կիրառելն այս իշխանության գլխավոր բնութագիրն է: Նրա խոսքով՝ մարտիմեկյան արյունահեղությամբ իշխանության եկած վարչախմբից այլ պահվածք ակնկալել հնարավոր չէ: «Հասկացեք վերաջպես, որ ժողովրդավարական սահմանադրություն ունեցող երկրում ժողովրդի նկատմամբ բռնությամբ որևէ հարց չի լուծվում: Սրա լավագույն օրինակն այն է, ինչ այսօր կատարվում է Ուկրաինայում: Մինչև բռնության կիրառումը, հակասություններն այնտեղ տեղավորվում էին երկրի զարգացման մոդելի շուրջ բանավեճի, դեմոկրատական գործընթացի շրջանակներում: Խաղաղ ցուցարարների դեմ հակասահմանադրական գործողությունների կիրառումից հետո Ուկրաինայի ժողովուրդն արդեն գործ ունի մարդու սահմանադրական իրավունքների խախտման հետ, և հենց դրանով է պայմանավորված ընդվզման ծավալը»,- ասաց նա:
Զուրաբյանը հայտարարեց, որ դեկտեմբերի 10-ին, ժամը 13:00-ին ՀԱԿ-ն Ազատության հրապարակից սկսելու է Մարդու իրավունքների ավանդական երթը, և այս նախաձեռնությանը միացել է նաև ՀԺԿ-ն: ՀԱԿ-ը կոչ է անում Հայաստանում ժողովրդավարության ու մարդու իրավունքների վիճակով մտահոգ բոլոր քաղացիներին՝ մասնակցել այդ երթին, ինչը թույլ կտա մեզ բոլորիս ավելի արդյունավետ պայքար տանել քաղաքացիների իրավունքների համար:
