Դեկտեմբերի 2-ին Բոսնիա և Հերցեգովինայում ՀՀ դեսպան Գագիկ Ղալաչյանն (նստավայրը` Աթենք) իր հավատարմագիրը հանձնեց Բոսնիա և Հերցեգովինայի նախագահության նախագահ Ժելկո Կոմշիչին:
Ժելկո Կոմշիչի հետ տեղի ունեցած առանձնազրույցի ընթացքում տեսակետներ փոխանակվեցին քաղաքական երկխոսության խորացման, երկկողմ հարաբերությունների աշխուժացման ուղիների վերաբերյալ: Երկուստեք ընդգծվեց երկկողմ համագործակցության զարգացման հեռանկարային ուղղությունների նախանշման, իրավապայմանագրային դաշտի ձևավորման կարևորությունը: Առաջնահերթ համարվել է բարձր մակարդակի երկկողմ շփումների ակտիվացումը, ինչպես նաև ապակենտրոնացված համագործակցության և միջխորհրդարանական կապերի խթանումը:
ՀՀ դեսպանը Բոսնիա և Հերցեգովինայի նախագահության նախագահին փոխանցել է ՀՀ Նախագահ Սերժ Սարգսյանի ջերմ ողջույնները, ինչին ի պատասխան Ժելկո Կոմշիչը խնդրեց իր բարեմաղթանքները հաղորդել Հայաստանի իր գործընկերոջը և հայ ժողովրդին:
