Eurocopter EC135 T2 ուղղաթիռները, որոնցից մեկն օրերս ընկել էր շոտլանդական Գլազգո քաղաքում՝ Clutha գարեջրատան շենքի վրա, եղել են ԵՄ իշխանությունների հատուկ վերահսկողության ներքո, քանի որ նախկինում դրանց աշխատանքի հանդեպ արդեն հավակնություններ առաջացել են: Այս մասին հայտնում է ITAR-TASS-ը՝ հղում անելով բրիտանական ԶԼՄ-ներին:
Հաղորդվում է, որ անցած տարվա մայիսին այդ տեսակի բոլոր ուղղաթիռների թռիչքները կարճ ժամանակով դադարեցվել էին այն բանից հետո, երբ ուղղաթիռներից մեկի պտուտակի սռնու վրա ճեղքեր էին առաջացել: Արդյունքում ԵՄ-ն հատուկ հրամանով ընկերությանը պարտավորեցրել է հատուկ նախաթռիչքային ստուգման ենթարկել ЕС135-ները:
Դեռևս հայտնի չէ՝ համապատասխան ստուգում անցե՞լ էր Գլազգոյում ընկած ոստիկանական ուղղաթիռը:
Ականատեսների պնդմամբ՝ ուղղաթիռն ընկել է քարի նման: Հայտնի չէ, թե ինչն է եղել անկման պատճառը: Նշվում է, որ ЕС135-ի շարժիչներն աշխատում են միմյանցից անկախ, ինչը բարձրացնում է սարքի կենսունակության մակարդակը: Բրիտանացի մասնագետներն իրավիճակը գնահատում են բավականին անորոշ: Դրան զուգահեռ այդ ուղղաթիռները սև արկղեր չունեն:
Մեծ Բրիտանիայում ներկայում ЕС135 տեսակի 57 ուղղաթիռ է կիրառվում: Երկու տասնյակը կիրառվում է ոստիկանական ուժերի, ևս այդքանը՝ արտակարգ բուժօգնության ծառայության կողմից: Մնացածը գտնվում են մասնավոր ձեռքերում:
Դեպքը տեղի էր ունեցել շաբաթ գիշերը, զոհվել էր 9 մարդ:
