ՀՀԿ-ական Մկրտիչ Մինասյանն այսօր լրագրողների հետ հանդիպման ժամանակ հերքեց մամուլի այն տեղեկությունը, թե ՀՀԿ-ում արդեն ընտրություններին առաջադրվելիք պատգամավորների ցուցակ են պատրաստել, որում չեն ընդգրկվել «հին» ՀՀԿ-ականները, այդ թվում՝ նաև Մինասյանը, և օլիգարխները:
«Նման ցուցակ չկա, ավելին՝ դա ժամանակավրեպ հարց է և ընդամենը ոմանց մտավարժանքի արդյունքը»,- հայտարարեց Մինասյանը:
Անդրադառնալով այն լուրերին, թե Երևանի նախկին քաղաքապետ, ՀՀԿ-ական Գագիկ Բեգլարյանը հավանական է՝ անցնի ՕԵԿ-ի շարքերը, Մկրտիչ Մինասյանը նշեց, որ ինքը, որպես Բեգլարյանի գործընկեր, որպես ՀՀԿ խորհրդի անդամ, նման ինֆորմացիա չունի. «Իմ կարծիքով, այդ ինֆորմացիան առնվազն ճիշտ չէ: Ես բավական լավ ճանաչում եմ Գագիկ Բեգլարյանին դեռևս Էրեբունու շրջանում աշխատած տարիներից: Գիտեմ նրա մարդկային կերպարի, ընկալումների, սկզբունքայնության մասին և համոզված եմ, որ նա որոշումներ կկայացնի՝ անպայման խորապես ուսումնասիրելով ընդհանուր վտանգը, իր ներքին աշխարհի հետ համագործակցելով»:
Ինչ վերաբերում է իր որդուն պատգամավոր դարձնելու վերաբերյալ խոսակցություններին, Մինասյանը նշեց, որ նման ցանկություն ինքը չունի, քանզի իր որդին աշխատանք ունի և չի ցանկանում զբաղվել քաղաքականությամբ:
Մինասյանը հիշեցրեց, որ Նոր Նորքի թաղապետ Դավիթ Պետրոսյանից (ՀՀԿ-ական պատգամավոր Ռաֆիկ Պետրոսյանի որդին) հետո իր որդին ցանկություն ուներ առաջադրվել այդ պաշտոնում, սակայն իրենք որոշել են, որ մեկ Մինասյանի թաղապետ լինելը բավական է. «Մեր ընտանիքը, իմ ազգանունը այդ համայնքում հեղինակություն ունի և պետք չէ, որպեսզի մենք այդ հեղինակության վրա բիծ քաշենք: Ինքն իր աշխատանքն ունի, նորմալ երիտասարդ է և այդպիսի ցանկություն չունի»: