«Վլադիմիր Պուտինի այցը Հայաստան կործանարար է Հայաստանի համար, բայց կարծում եմ՝ եթե նա իմանար իրականությունը, հաստատ չէր գա»,-«Առաջին լրատվական»-ի հետ զրույցում ասաց ներկայումս Մոսկվայում բնակվող անկախ իրավապաշտպան Արբակ Խաչատրյանը:
Վերջինս ընդգծեց, որ Պուտինը ինֆորմացիա ստանալու մի քանի աղբյուր ունի, և բոլոր այդ աղբյուրներն էլ նրան իրականությունը չեն հայտնում. «Իրեն թվում է, թե Հայաստանում ոգևորված են իր գալստյամբ, թե հայերն իրեն սիրում են, բայց դա վստահաբար այդպես չէ, ու եթե նա իրականությունն իմանար՝ չէր գա»,-ասաց Խաչատրյանը:
Խոսելով այցի և այն մասին, թե ինչ պատրաստություններ են իշխանությունները տեսել Հայաստանումնրա այցին ընդառաջ՝ մասնավորապես Գյումրիում և Երևանում, Արբակ Խաչատրյանն ասաց. «Օրեր առաջ aravot.am-ի հետ զրույցում ասել եմ նրա այցի հետևանքների մասին, իսկ ինչ վերաբերում է Հայաստանի իշխանություններին՝ նույնիսկ ասելիք էլ, որպես այդպիսին, չկա՝ այդպիսի իշխանություններից ուրիշ բան սպասելն անհնարին է,որիշ մակարդակ սպասելն անհնարին է. ժողովրդի համար ոչինչ չանել, իսկ ինչ-որ Պուտինի համար նման պատրաստություններ տեսնել: Ով ուզում է լինի՝ կհարգես Պուտինին, չես հարգի, որևէ կապ չունի. ցանկություն ունեի՞ր Գյումրիի կամ Երևանի ժողովրդի համար ինչ-որ բան անելու, ասֆալտ փռելու և այլն՝ մինչ դա անեիր: Բայց իրենց մակարդակը դա է. ուրիշ բան սպասել անհնարին է:
Ես պարզապես մի բան չեմ հասկանում՝ ԽՍՀՄ են ուզում, էլ ինչո՞ւ առանձնացան, ինչներին էր պետք, թող մնային Ռուսաստանի կազմում»:
Ինչ վերաբերում է Հայաստանի հստակ ռուսամետ կողմնորոշում ունեցող, բայց իրենց ընդդիմադիր հռչակած ընդդիմադիր ուժերին, որոնց գոյատևումը Ռուսաստանի կողմից ևս մեկ անգամ Սերժ Սարգսյանին լեգիտիմացնելուց հետո դժվար է լինելու, Արբակ Խաչատրյանն ասաց. «Ընդհանրապես ինձ համար ցավալի է, որ Հայաստանում պրոհայկական ուժեր չկան, ժողովրդին այն վիճակի են հասցրել, որ փնտրում են այնպիսի ուժ, որ իրենց կփրկի, իսկ այդպիսի ուժ չկա:
Այդպիսի պրոխաղերն ինձ համար անընդունելի են: Հայաստանում այժմ, ցավոք,պրոհայկական ոչինչ չկա, ուստի ինձ համար միևնույն է՝պրոռուսական ուժերն ինչ կանեն կամ ինչ կլինի: Ոչ ոք չի ասում՝ եկեք «պրո» չլինենք, ժողովրդի համար աշխատենք:«Պրո» հասկացողությունը հիմարություն է: Քաղաքականությունն այնպիսի բանէ, որ չգիտես՝ վեց ամիս հետո ինչ կլինի, իսկ Հայաստանում ժողովրդի կողքին կանգնած ուժ չկա: Հայաստանն իմ տունն է, և ես շատ եմ ցավում դրա համար»,-եզրափակեց նա:
