Կիևում «Եվրամայդան» ակցիայի մասնակիցներին ցրելու հետևանքով կան տուժածներ: Այս մասին հայտնում է ուկրաինական «5-րդ ալիքը»:
«Կան տուժածներ: Գրեթե բոլոր տուժածները ջարդված գլուխներով են»,- հայտնել է հեռուստաալիքի լրագրողը դեպքի վայրից: Ինչպես փոխանցում է «Ուկրաինսկայա պրավդան»՝ հղում անելով պատգամավոր Անդրեյ Շևչենկոյին, ցույցը ցրելու ընթացքում մի քանի տասնյակ մարդ է տուժել:
Ինչպես հայտնում է Նարնջագույն հեղափոխության մասնակիցների կոալիցիայի մամլո ծառայությունը, ակցիան ցրելու համար ժամանել էին հատուկ նշանակության «Բերկուտ» ջոկատի մոտ 1000 աշխատակիցներ:
«Մարդկանց պարզապես սպանել են փայտերով: Արցունքաբեր գազ են կիրառել: Հրապարակում պայթյուններ են լսվել: Բազմաթիվ մարդիկ են վիրավորվել: Մարդկանց, ինչպես աղբ, դուրս են նետել հրապարակից»,- ասվում է կոալիցիայի հաղորդագրության մեջ:
Ընդդիմադիրների մամլո ծառայության տվյալներով՝ ակտիվիստների մի մասին ձերբակալել են, իսկ հրապարակում բջջային կապը՝ խլացրել:
