ԱՄՆ նախագահ Դոնալդ Թրամփն ասել է, որ ավագ եղբոր օրինակն իրեն ստիպել է ընդմիշտ հրաժարվել ալկոհոլից և ծխելուց, գրում է The Washington Post պարբերականը։
Նշվում է, որ նախագահի եղբայրներից Ֆրեդ Թրամփը տառապել է ալկոհոլից կախվածությունից և մահացել 43 տարեկանում։
«Ես եղբայր ունեի՝ Ֆրեդը։ Շատ լավ տղա էր, գեղեցիկ, հիանալի մարդ, ինձանից շատ ավելի լավը։ Բայց նա խնդիր ուներ։ Նա ալկոհոլի հետ խնդիր ուներ և ասում էր ինձ՝ մի՛ խմիր, մի՛ խմիր»,-պատմել է Թրամփը։
«Ես դասը յուրացրեցի Ֆրեդի շնորհիվ»,-հավելել է ԱՄՆ նախագահը։
Թրամփն «օփիոդային համաճարակ»-ի դեմ պայքարը 2016-ի իր նախընտրական քարոզարշավի գլխավոր կետերից մեկն էր դարձրել։ Նախագահը բազմիցս ասել է, որ լավ ծանոթ է թմրանյութերից կախվածության խնդրի հետ, քանի որ տեսել է, թե ինչպես է իր եղբայրը պայքարում դրա դեմ։
