«Հեղափոխությունը անակնկալ է լինում։ Մի բանը, որը կազմակերպված է, դա չի կարող հեղափոխություն լինել։ Պլանավորված հեղափոխություն չի լինում։ Այդ իմաստով, առաջիկայում Հայաստանում որևէ լուրջ փոփոխություններ չեն կարող լինել։ Ոչ ոք դրանով շահագրգռված չէ»- «Առաջին լրատվական»-ի հետ զրույցում, անդրադառնալով ներքաղաքական զարգացումներին, ասաց Գերագույն խորհրդի պատգամավոր, ընդդիմադիր գործիչ Ազատ Արշակյանը։
Մեր զրուցակցի խոսքերով՝ Հայաստանը, սկսած 2013 թվականի սեպտեմբերի 3-ից, կորցրել է ինչ-որ բան որոշելու իրավունքը։ Հայաստանը միայն հրահանգներ, շրջաբերականներ կատարող է։ «Շրջաբերական է գալիս, և ըստ այդ շրջաբերականի, Հայաստանում կյանքը կարգավորվում է։ Եվրասիական միությունում չի կարող իշխանափոխություն լինել։ Ասենք՝ Կեմերովոյի մարզում իշխանափոխություն չի կարող լինել։ Էնտեղ մի պաշտոնից մյուսին տանում են այլ պաշտոնի։ Փոփոխություն չպետք է լինի։ Հետադիմության ռեժիմը պահանջում է կայունություն։ Ոչ մի բան չպետք է փոխվի»,- ասաց Արշակյանը։
Արշակյանի խոսքերով՝ այսօր հարթակում գտնվող անձինք փոփոխության հասնելու համար պետք է դիմեին Զորի Բալայանին։ Նա ճիշտ ձևը գիտի։ «Հարթակի անձինք պետք է նամակ գրեին նրան, ով այսօր իշխում է, տնօրինում և որոշումներ է կայացնում։ Նրան հարկավոր է նամակ գրել, որ մենք նոր իշխան, նոր խան ենք ուզում։ Խնդրում ենք, սրան հանել և ուրիշին բերել։ Ցարն էլ, ըստ այդմ, կորոշի՝ ում, և արդեն դրա համար կարելի է ակցիաներ անել, հացադուլ, ինքնահրկիզում անել, որ նրա կամքը կատարվի։ Եթե մենք ճանաչում ենք այդ Եվրասիական միությունը, ապա պետք է դիմել ըստ հասցեի, և նրանից փոփոխություն ակնկալել։ Պետք է դիմել Պուտինին, նա էլ կորոշի՝ ով լինի, որ պաշտոնին»,- ասաց Արշակյանը։
Այս ֆոնին, մեր զրուցակցի խոսքերով՝ տեղի ունեցող ակցիաներն այդքան էլ անարդյունք չեն։ Դրանք երիտասարդ քաղաքական գործիչների համար փորձաշրջան են, նրանք կարող են մարզվել։ Կան փորձառու, ճարպիկ գործիչներ, որոնց համար այս ակցիաները լավ առիթ են հետագայում ԱԺ-ում, կամ կառավարման այլ համակարգերում տեղավորվելու համար։ Եվ, ըստ Արշակյանի, կան մարադյորներ՝ քաղաքական ասպարեզից հեռացվածներ, որոնց համար տեղ է բացվել, եկել, խցկվում են։
Առավել մանրամասն՝ տեսանյութում։