Վերահսկիչ պալատի նախագահ Իշխան Զաքարյանը դատի է տվել ԱԺ պատգամավոր, ՀՀԿ խմբակցության անդամ Սպարտակ Մելիքյանին: Այսօր այդ մասին ԱԺ ամբիոնից հայտարարեց պարոն Զաքարյանը:
Սպարտակ Մելիքյանը երեկ հայտարարել էր, թե Անանիա Շիրակացի համալսարանն արժանացել է խիստ քննադատության միայն այն պատճառով, որ հրաժարվել է բավարարել ստուգող խմբի ղեկավարի պահանջը՝ «սև ցուցակում» չհայտնվելու համար տալ 4000 դոլար կաշառք»:
Իշխան Զաքարյանն այսօր հայտարարեց, թե իրենց ստուգումների արդյունքում ոսկորը շատերի կոկորդում է մնում: «Մենք շատ լավ հասկանում ենք, որ պալատի բաց ու հրապարակային գործունեության արդյունքում ծնված յուրաքաչյուր արձանագրություն կարող է բերել այն նույն գնահատականին, ինչ հնչեցվեց երեկ պատգամավորներից կողմից: Այն, ինչ արձանագրել ենք Անանիա Շիրակացի համալսարանում, միանշանակ ճիշտ է, հիմնավոր են և անառարկելի: Նաև ուզում եմ տեղյակ պահել խորհրդարանին, որ Անանիա Շիրակացի համալսարանի 100 տոկոս բաժնետերը, սեփականատերը այն նույն պատգամավորն է, որ երեկ խոսում էր այդ համալսարանի մասին: Սահմանադրության համապատասխան հոդվածով այդ տեսակ գործունեությունն արգելվում է և անհամատեղելի է պատգամավորական գործունեության հետ, որի հետ կապված մենք մեր գրավոր նամակը կներկայացնենք»,- հայտարարեց Զաքարյանը: Վերջինս նաեւ ասաց, որ կա իրավական ճանապարհ` դիմել դատարան` զրպարտւթյան համար: Վերահսկիչ պալատը դիմել է դատարան: Այս խնդրի հետ կապված մնացած բոլոր հարցերի վերաբերյալ մենք կխոսենք օրենքի դաշտում: Հարցը սրանով համարում եմ ավարտված»,- հայտարարեց Իշխան Զաքարյանը:
ՀՀԿ խմբակցության պատգամավոր Սպարտակ Մելիքյանը պատրաստվում է դիմել խորհրդարանին` իրեն անձեռնմխելիությունից զրկելու համար, որպեսզի ինքը խոչընդոտ չհանդիսանա քննությանը: «Չեմ կարծում, թե անլուրջ մարդու տպավորություն եմ թողնում, որպեսզի առանց ապացույցների՝ այսպիսի ամբիոնից նման բարձր հայտարարություններ անեմ»,- նշեց Մելիքյանը: Ի դեպ, վերջում նա նաև հավելեց, որ ՎՊ-ին ուղղված տվյալ մեղադրանքներով հանդես է գալիս բացառապես իր անունից և այս մեղադրանքներն ու իր տեսակետները պետք չէ վերագրել ՀՀԿ-ին: Մելիքյանը նաեւ ասաց, որ միայն դատարանում կհրապարակի ՎՊ այն պաշտոնյայի անունը, որը կաշառք է պահանջել:
