Սիրիայի իշխանությունները չեն պայքարում ցուցարարների դեմ, այլ գործում են ընդդեմ զինված «սադրիչների» և գրոհայինների: Այս մասին հայտարարել է Սերգեյ Լավրովը: «Կարևորը՝ չփորձել գործը ներկայացնել այնպես, թե Սիրիայի անվտանգության ուժերը, զինված ուժերը գործում են բացառապես խաղաղ ցուցարարների դեմ: Այնտեղ շատ սադրիչներ կան` զենքները ձեռքներին: Ես կարծում եմ, որ ոչ մի պետություն չի հանդուրժի խռովության դեպքեր»,- ասել է Լավրովը՝ հանդիպելով լրագրողների հետ Աստանայում, ուր տեղի է ունենում Շանհայյան համագործակցության կազմակերպության գագաթնաժողովը: Այս մասին հաղորդում է RIA-Novosti գործակալությունը:
Լավրովի խոսքերով` Սիրիայում գործում է զինված գրոհայինների մեծ խումբ, որոնք մի քանի բնակավայր են գրավել, և Սիրիայի իշխանությունները հիմա ազատագրում են դրանք: Լավրովը վերահաստատել է, որ Ռուսաստանը չի պաշտպանելու Սիրիայի ռեժիմի դեմ ՄԱԿ-ում առաջարկված բանաձևի նախագիծը:
«Մենք պնդում ենք, որ այս ամենը պետք է դադարեցվի (զենքի օգտագործումն ու բռնությունը.- 1in.am): Այն բարեփոխումները, որոնց մասին հայտարարել է նախագահ Ալ-Ասադը, պետք է իրականություն դառնան: Սակայն միաժամանակ այն ուժերը, որոնք գլխավորում են սիրիական ընդդիմությունը, նրանք, ովքեր իրականացնում են զինված հարձակումներ կառավարության, կառավարական ուժերի և կառավարական շենքերի վրա, պարտավոր են արձագանքել երկխոսության հրավերքին»,- ասել է Լավրովը:
