Հայերենի հանդեպ հավուր պատշաճի հոգատարություն չկա: Այսօր տեղի ունեցած մամուլի ասուլիսի ժամանակ այս մասին ասաց Լեզվի պետական տեսչության նախկին պետ, լեզվաբան Լավրենտի Միրզոյանը՝ հավելելով, որ չգիտես ով՝ ցանկանում է խաղալ հայերենի անաղարտության դեմ:
Նրա խոսքով, հայոց լեզվի առջև ծառացած խնդիրները գնալով ավելի ու ավելի են շատանում: «Այսօր մարդիկ իրավացիորեն դժգոհում են եթերի, մամուլի լեզվից: Միաժամանակ, 90-ական թվականների համեմատ՝ եթերային լեզուն զգալիորեն լավացել է, սակայն հիմա էլ շատ են լուսագրերում ու գովազդներում առկա ուղղագրական սխալները»,- նկատեց լեզվաբանը:
Անդրադառնալով Հայաստանի՝ Մաքսային միությանը անդամագրվելուց հետո հայերենի նկատմամբ ռուսերենի հնարավոր գերակայության հարցին՝ Լավրենտի Միրզոյանը նկատեց, որ ոչ մի օտար լեզվի պատճառով հայերենը չպետք է տուժի: «Մեզ լեզվական քաղաքականության պետական ծրագիր է անհրաժեշտ, իսկ այսօր հանրակրթական հաստատություններում մայրենիի դրվածքն աղետալի է: Մտավախություն ունեմ, որ գալու է ժամանակ՝ ռուսերենին մեր երկրում պետական երկրորդ լեզվի կարգավիճակ տրվի: Դրա նախադրյալները կան: Վաղը-մյուս օրը խնդիրներ ենք ունենալու անգլերենի, ֆրանսերենի և գերմաներենի հետ: Հիսուն տարի անց Հայաստանում, հնարավոր է, հայերենով խոսող մարդիկ չլինեն»,- նշեց նա՝ ցավ հայտնելով, որ Լեզվի պետական տեսչությունն այսօր զուտ խորհրդատվական մարմին է:
Լավրենտի Միրզոյանը նաև համոզմունք հայտնեց, որ Տերմինաբանական կոմիտեին պետք է հատուկ կարգավիճակ տրվի, և այն պետք է գործի Լեզվի պետական տեսչությունից անկախ՝ ՀՀ նախագահին կամ կառավարությանն առընթեր:
