Սոս Սարգսյանի անվան Համազգային թատրոնում օրերս իր հաջող մեկնարկն ունեցավ «Սանտա Կրուս» հետաքրքրաշարժ ներկայացումը: Հեռանկարում նախատեսվում են այլ բեմադրությունների առաջնախաղեր: Նոր ներկայացումների, ինչպես նաև մոտ ապագայում նկարահանվող ֆիլմերի ծրագրերի մասին «Արմենպրես»-ի թղթակիցը զրուցել է թատրոնի և կինոյի ռեժիսոր, Համազգային թատրոնի գեղարվեստական ղեկավար և տնօրեն Վիգեն Չալդրանյանի հետ:
«Երկու ամիս հետո կիրականացնենք հաջորդ պրեմիերան: «Ձայն լռության կամ վեցերորդ պատվիրանը» պիեսի հիման վրա կբեմադրվի «Ձայն լռության» ներկայացումը: Պիեսի հեղինակը ես եմ, իսկ համահեղինակը` Գուրգեն Խանջյանը: Այդ գործը թատերասերներին հայտնի է, քանի որ շուրջ երեք տարի եղել է Հ. Ղափլանյանի անվան Դրամատիկական թատրոնի խաղացանկում: Այն մշտապես լեփ-լեցուն դահլիճներում է անցել. ներգրավված էր հրաշալի դերասանական կազմ: Սակայն երեք տարի հետո ներկայացումը հանվեց խաղացանկից, և ես նկարահանեցի համանուն կինոնկարը»,-պատմեց Չալդրանյանը:
Համազգային թատրոնում նախատեսված ներկայացման բեմադրությունը Վիգեն Չալդրանյանը վստահել է դերասան և ռեժիսոր Դավիթ Հակոբյանին:
«Երկու դերասանական կազմի հետ կաշխատենք` Նարինե Գրիգորյան, Վարշամ Գևորգյան և երիտասարդ դերասան Ստեփան Ղամբարյան ու առավել երիտասարդ դերասանուհի Ժաննա Վելիցյան: Կարծում եմ, որ թատերասերն անպայման կցանկանա դիտել թե՛ մի, թե՛ մյուս կազմի խաղը»,-ասաց նա:
Անդրադառնալով կինոարվեստին, որից Չալդրանյանը, թատրոնի գեղարվեստական ղեկավար, այնուհետև տնօրեն ընտրվելուց հետո որոշ չափով հեռացել է, ինչպես նաև իր հասցեին հնչող քննադատություններին` ռեժիսորն ասաց, որ իր ողջ ստեղծագործական կյանքում և՛ լավն է լսել, և՛ վատը: «Փառք Աստծո, միջինը չեմ լսել. սարսափելի է, երբ անտարբեր են: Բարեբախտաբար, իմ աշխատանքի հանդեպ երբեք անտարբեր չեն եղել: Ինձ կամ բարձրացրել են, կամ տապալել: Մի խոսքով՝ սառը և եռացրած ջրի արանքում է եղել իմ ողջ ստեղծագործական կյանքը»,- խոստովանեց նա:
Ռեժիսորի խոսքով` ինքը երբեք չի դադարում ծրագրեր կազմել և ներկայումս ունի սցենար, որի վրա աշխատում է: «Կարծես թե որոշ նախադրյալներ կան, և ես պատրաստվում եմ սկսել «Գրիգոր Նարեկացի» կինոնկարը: Շատ կարևոր մի գործ՝ «Վարդապետի լռությունը» ֆիլմից հետո: Դա իմ ուխտն է կինոյում՝ կինոեռապատում նկարահանելը: Հայ մշակութային Սուրբ Երրորդության մասին է խոսքը` Մեսրոպ Մաշտոց, Գրիգոր Նարեկացի, Կոմիտաս: Ես վերջից եմ սկսել»,-ընդգծեց Չալդրանյանը:
Ռեժիսորը հույս հայտնեց իր ծրագրերը իրականացնել 2019 կամ 2020 թվականներին: «Ես շատ զբաղված եմ, բայց ինձ երջանիկ մարդ եմ համարում, քանի որ երջանիկ է նա, ով իր սիրած գործով է զբաղվում, իսկ ես անչափ սիրում եմ իմ աշխատանքը, իմ մասնագիտությունը և իմ առաքելությունը»,-եզրափակեց Վիգեն Չալդրանյանը:
