Այդ կուսակցությունները և խմբավորումներն իրենց օրակարգն ունեն, որն ավելի շատ իմիտացիոն գործընթաց է, այն ավելի ճիշտ կլինի անվանել բեմականացում, քան ներքաղաքական զարգացում։ Այդ մասին «Առաջին լրատվական»-ի հետ զրույցում նշեց քաղաքագետ Սուրեն Զոլյանը՝ անդրադառնալով տարբեր քաղաքական ուժերի կողմից սկսված քաղաքական գործընթացներին, որոնք ուղղված են Սերժ Սարգսյանի վերարտադրության դեմ։
«Ընդ որում բեմականացում է՝ առանց հանդիսատեսի։ Ավելի շատ թատրոն է թատրոնի համար, որովհետև այդ բոլոր գործակատարները քաղաքական գործիչներ են և ինչ-որ զբաղմունք պետք է ունենան։ Այս առումով քաղաքից քաղաք գնալը նման է մի թափառաշրջիկ թատրոնի, որը բնական է, ունի իր հանդիսատեսը և դա լավ է, բայց ինչ-ինչ ազդեցություն քաղաքական կյանքի վրա չի կարող ունենալ, որովհետև քաղաքականությունը որոշակի գործիքակազմ է, որին պետք է տիրապետել։ Այս դեպքում դա բացակայում է, ու պետք չի դրանում մեղադրել այդ գործիչներին։ Ուղղակի իրավիճակն այնպիսին է, որ այսօր հրապարակային քաղաքականությամբ զբաղվելն անիմաստ է։ Եթե խոսքը ոչ թե իմիտացիոն, այլ իրական քաղաքական գործընթացների մասին է, ապա շատ շուտով այդպիսիները հայտնվում են բանտում։ Նրանց գրպանում փոքրիկ հրթիռ են գտնում կամ մեկ այլ բան»,- ասաց Զոլյանը։
Նրա խոսքերով՝ ինչ որ հիմա արվում է, արվում է համապատասխան սցենարի շրջանակներում, և գնահատել այդ սցենարն անիմաստ է, որովհետև դա քաղաքականության հետ կապ չունի, ինչ-ինչ նպատակների հասնելու խնդիր է։ «Հայաստանի առջև հիմա բոլորովին այլ նպատակներ են դրված, և այն, ինչ արվում է, ինչ-որ ձևով շեղում է նաև այդ հիմնական խնդրից՝ Հայաստանի ապագայից»։
Ամբողջությամբ՝ տեսանյութում։
