Հայաստանն ու Հունաստանը դիմագրավում են անվտանգության ընդհանուր մարտահրավերների ու սպառնալիքների: Այսօր Երևանում նման հայտարարություն արեց Հունաստանի պաշտպանության նախարար Պանայոտիս Կամենոսը: Վերջինս Հայաստանի պաշտպանության նախարար Վիգեն Սարգսյանի հետ հանդես է եկել համատեղ մամլո ասուլիսով: Կամենոսն ընդգծել է՝ Հունաստանն ու Հայաստանը միշտ եղել են ու կլինեն միասին. «Քանի որ մենք ունենք ընդհանուր պատմություն, հայ և հույն ժողովուրդների երկու մեծ ցեղասպանությունների ընդհանուր զոհեր, ինչպես նաև շարունակում ենք խնդիրներ ունենալ նույն ընկերների ու դաշնակիցների հետ»:
Նա նաև ընդգծել է, որ այժմ Հայաստանն ու Հունաստանը դիմագրավում են անվտանգության ընդհանուր մարտահրավերների ու սպառնալիքների. «Դա պահանջում է համընդհանուր մոտեցում ու փոխըմբռնում, ամուր քաղաքական կամք ավելի արդյունավետ գործելու համար»-Երևանում հայտարարել է ՆԱՏՕ-ի անդամ Հունաստանի պաշտպանության նախարարը:
Մարդկային զարգացման միջազգային կենտրոնի նախագահ, ԱԺ նախկին պատգամավոր Թևան Պողոսյանը «Առաջին լրատվական»-ի հետ զրույցում Հունաստանի պաշտպանության նախարարի այցը Երևան դրական գնահատեց: Պողոսյանն ընդգծեց՝ Հայաստանը Հունաստանի հետ շատ երկարատև երկկողմանի հարաբերություններ ունի նաև ռազմական ոլորտում. «Ինչպես գիտեք՝ շատ երկար տարիներ է՝ Հայաստանից սպաներ են մեկնում Հունաստանում սովորելու, համագործակցելու: Ժամանակին նույնիսկ եռակողմ համագործակցության ձևաչափ կար՝ Հայաստան-Հունաստան-Իրան, նախքան Իրանի հանդեպ սահմանված պատժամիջոցները: Հունաստանը միշտ էլ ջերմ հարաբերություններ է ունեցել Հայաստանի հետ՝ և՛ երկկողմանի և՛ նաև ՆԱՏՕ-Հայաստան համագործակցության շրջանակներում: Ես շատ բարձր եմ գնահատում այս համագործակցության շարունակությունը»,- ասաց Պողոսյանը:
Մեր զրուցակիցը շարունակում է. «Ուրախ եմ, որ կա նաև տեղեկություն, որ Հունաստանն ու Հայաստանը համատեղ փորձ ունեն նաև նոր զինատեսակների հետ կապված: Դա ենթադրում է, որ Հունաստանն ու Հայաստանը համատեղ փորձում են ոչ միայն կրթական, մշակութային ոլորտներում համագործակցել, այլ կա նաև մշակված հայ-հունական համատեղ զինատեսակ, որը փորձարկվել է, և որը թույլ է տալիս դիպուկահարների դեմ պայքարել: Այնպես որ, համագործակցությունը միայն բարձր կարելի է գնահատել, ուրախ եմ, որ այն շարունակվում ու խորանում է»,- եզրափակեց նա:
Փորձագետ Ռուբեն Մեհրաբյանը համոզմունք է հայտնում, որ Հայաստանի և Հունաստանի միջև բոլոր ոլորտներում համագործակցության շատ մեծ ներուժ կա, որը տարիներով պարզապես չի օգտագործվել. «Հունաստանի պաշտպանության նախարարն այստեղ հայտարարեց, որ Հայաստանն ու Հունաստանը դիմագրավում են նույնանման մարտահրավերների ու սպառնալիքների: Ըստ իս՝ դա չափազանց կարևոր հայտարարություն է: Պետք է հաշվի առնել, որ Հունաստանը ՆԱՏՕ-ի ամենամիլիտարիզացված պետություններից մեկն է: Մի աբսուրդ իրավիճակ է՝ Հունաստանի գլխավոր սպառնալիքներից մեկը ՆԱՏՕ-ի մեկ այլ անդամ երկիր Թուրքիան է. դա ՆԱՏՕ-ի համար գնալով ավելի մեծ խնդիր է դառնում»:
Մեհրաբյանը շարունակում է. «Մամուլից տեղեկացանք, որ շատ կարևոր քննարկում է եղել, և խոսք է գնացել սպառնալիքների և մարտահրավերների վերագնահատման հետ կապված՝ հատկապես Թուրքիայի կողմից նեոօսմանական նկրտումների վերածննդի համատեքստում: Հունաստանն այսօր լուրջ խնդրի առջև է կանգնած, և իրենք ևս անհրաժեշտություն ունեն համանման խնդիրներ ունեցող երկրների հետ կոորդինացնել իրենց քաղաքականությունը, քաղաքական քայլերն ու ջանքերը դրանց դիմագրվելու ուղղությամբ: Ես բարձր եմ գնահատում Հունաստանի պաշտպանության նախարարի այցը Հայաստան, բարձր մակարդակով հայտարարությունները, որոնք պետք է իրենց շարունակականությունն ունենան ապագայում: Այդ բոլոր հայտարարություններից պետք է գործնական հետևություններ արվեն»։
