Արցախում Ասյա Խաչատրյանի հետ տեղի ունեցած միջադեպը մի քանի հարթությունում պետք է դիտարկել, առաջինը՝ տարբերությունն է արտաքինի առումով, հատկապես կնոջը վերաբերող։ Այդ մասին «Առաջին լրատվական»-ի հետ զրույցում նշեց մշակութային մարդաբան Աղասի Թադևոսյանը։
Նրա խոսքերով՝ Հայաստանն ու Արցախը ագրարային պատրիարխալ հասարակություն է, որը տարբերվում է հետագրարային և մոդեռնիստական պատրիարխալիզմից նրանով, որ ավելի խիստ խմբակային է տղամարդու իշխանության հիերարխիզմը։ «Այսինքն՝ ամբողջ հասարակությունում տղամարդն է որոշում, թե ճիշտը որն է, որն է մազերի ճիշտ ձևը, հագուստի ձևը, նաև ինքն է որոշում, թե ինչպիսին պետք է լինի կինը։ Հանրային վայրերում կնոջ տեղաշարժը այդ տիպի հասարակություններում արգելված է։ Այդպիսի հասարակություններում կինը մի տրաեկտորիա ուներ՝ տնից աղբյուր և աշխատավորներին հաց տանելը։ Մնացած ժամանակ կինը պետք է մնար տան պատերի մեջ»,- ասաց նա։
Աղասի Թադևոսյանի ներկայացմամբ՝ այդ ստերեոտիպային մտածողությունը իշխանական մտածողություն է, որը ձևավորում է այդ հիերարխիկ բուրգը, որի վերևում գտնվում է երկրի ամենադոմինանտ տղամարդը։
«Տվյալ դեպքում, այդ տղամարդու, անկախ նրանից, թե նա ով է, մտածողության մեջ չի տեղավորվում կապույտ մազը։ Սրանից մի 50 տարի առաջ չէր տեղավորվում նաև դեղին մազը։ 1970-ական թվականներին այդ դեղին մազի պատը սկսեցին ջարդել աղջիկները։ Շալվարը չէր տեղավորվում այդ մտածողության մեջ, կարճ շրջազգեստը չէր տեղավորվում։ Մոտ 15 տարի առաջ կարմիր մազի արգելքը սկսեցին ջարդել։ Բոլոր այդ ստերեոտիպերը ժամանակի ընթացքում ջարդվում են, բայց ամբողջ խնդիրն այն է, որ այդ ստերեոտիպերը իշխանական բնույթի են»,- ընդգծեց նա։
