Նախորդ տարի նոյեմբերի 20-ին «Նախախորհրդարանն» ազդարարեց իր գալուստը, որը պայմանավորված էր համակարգային ճգնաժամով և կառավարման ոլորտում առկա խնդիրներով: Ըստ «Նախախորհրդարանի» նախագահության անդամ Գարեգին Չուգասզյանի` այս ճգնաժամի հաղթահարման առաջին նախապայման պետք է համարվեր արդյունավետ այլընտրանքային կառավարման ապահովումը:
Բացի դրանից՝ համապատասխան կադրային ռեսուրսի ներգրավումն էր, նոր որակի պետության ձևավորման համար անհրաժեշտ ներկայացուցչական մարմնի ձևավորումը:
Նա նշեց, որ ռազմավարական հայեցակարգի ստեղծման առումով պատրաստ է 190 էջանոց մի փաստաթուղթ, որը դրվել է հանրային լսումների: Վերջին ամիսներին 3 հանրային լսումներ են անցկացվել, որոնք նվիրված էին արտաքին հարաբերությունների ռազմավարական հայեցակարգին, ինչպես նաև սոցիալ-տնտեսական հայեցակարգին և դրա հետ կապված ենթախնդիրներին: Նրա խոսքով` սա այն անհրաժեշտ աշխատանքն է, առանց որի Հայաստանում համակարգային փոփոխություններ չեն լինի:
Այս հայեցակարգն աստիճանաբար ներկայացվում է հանրությանը` առավել լայն հանրային ուշադրություն գրավելու, նաև լրամշակելու նպատակով:
Նախախորհրդարանի համակարգողի տեղակալ Եղիա Ներսիսյանը նշեց, որ դեկտեմբերի 14-ից «Ազատագրենք Հայաստանը» ամենշաբաթյա երթեր են սկսելու:
Գարեգին Չուգասզյանի խոսքով` Հայաստանում քաղաքական դաշտը փոշիացված է, իրականում ունենք դեկորատիվ իշխանություն, դեկորատիվ մարմնի հետ համագործակցությունը, նրա խոսքով, ծիծաղելի կլինի իրենց կողմից:
«Մենք գիտակցում ենք, որ 88-ից սկսած անկախության գործընթացը կիսատ է մնացել: Իրական ուժը, որը հակառակորդ է հանդես գալիս Հայատսանում իսկապես պետականության ստեղծման համար, իր մանկլավիկներն ունի»,- ասաց Գարեգին Չուգասզյանը:
Մեր այն հարցին՝ արդյոք փոքր, հատվածական պայքարներով էներգիան ճի՞շտ է օգտագործվում, և արդյոք չպե՞տք է ուժերը հավաքվեն կոնսոլիդացիայի համար: Ի պատասխանէ Գարեգին Չուգասզյանը նկատեց, որ փոքր պայքարների ընթացքում ժողովուրդը առիթ է ունենում տեսնել այն մարդկանց, ովքեր առաջամարտիկ են: Սա վիշապի գլուխների դեմ պայքար է:
Եղիա Ներսիսյանն էլ նշեց, որ հատվածական պայքարներով էներգիա չի սպառվում, դա կարևոր է: Նա օրինակ բերեց Թռչկանի հաղթանակը: Նրա խոսքով՝ Հայաստանում կառուցվել է 147 հէկ, և այսօր Թռչկանի գետը նախադեպ է դաձել մյուս գյուղերին՝ դուրս գալ պայքարի և չթողնել, որ հէկ կառուցվի: Նա նշեց, որ հենց Թռչկանի կետային պայքարը հուսադրում է, որ շատ կարևոր են նման կետային պայքարները, քանի որ հանրության համար հուսադրող են:
Լուսանկարը՝ Photolure-ի
