Կենսաթոշակային պարտադիր կուտակային համակարգի մասին օրենքը չի բխում մեր երկրի և անկախության շահերից: Այսօր կայացած մամուլի ասուլիսի ժամանակ նման տեսակետ հայտնեց հասարակագետ Կարինե Հակոբյանը:
«Մենք այս դեպքում գործ ունենք մարդու իրավունքների ոտնահարման հետ: Ինչո՞ւ մարդ պետք է երիտասարդ տարիների աշխատավարձի մի մասը կտրի իր ընտանիքից և ստիպողաբար կուտակի: Գուցե նա հույս ունի, որ տարիներ անց Հայաստանն առավել ապահով տնտեսություն է ունենալու, և ինքն էլ ավելի լավ է ապրելու: Ինչո՞ւ մենք մեր ազգային գումարները պետք է պահ տանք օտար կազմակերպությունների: Ինչո՞ւ հայկական որևէ բանկ չի կարողանում կազմակերպել այս գործընթացը: Նշանակում է՝ իշխանությունն այստեղ անկարող է որոշումներ կայացնել:
Սա 21-րդ դարի ստրկություն է, ՀՀ կառավարությունն այս հարցում ձայնազուրկ է: Միակ ելքը՝ օրենքը չընդունելու հասարակական բողոքն է: Այս օրենքը սոցիալական համերաշխության խախտման լավագույն օրինակ է և իրեն չի արդարացնելու: Ակնհայտ է, որ դրա վերաբերյալ սոցիալական դժգոհություն կա, սակայն վատն այն է, որ մենք երբեք չենք կարողանում համախմբվել»,- ասաց նա:
Կարինե Հակոբյանի խոսքով՝ կառավարության փորձը՝ դրական լույսի ներքո գնահատել օրենքը, անհաջողության է մատնված:
«Գործադիրի բերած փաստարկները բոլորովին համոզիչ չեն: Երբ պետությունն ասում է՝ վերցնում եմ գումարդ, իսկ հետո այն կրկին քեզ կվերադարձնեմ, ուզում ես ասել՝ թողեք իմ անձի մասին ես ինքս մտածեմ: Գուցե ես ուզում եմ իմ գումարները բանկո՞ւմ պահել: Այս օրենքով քաղաքացին ոչ մի իրավունք չունի, պետությունը նրանից ամեն ամիս ստիպողաբար գումար է վերցնում: Սա, ի վերջո, կհանգեցնի Հայաստանից միջին խավի արտագաղթի»,- համոզմունք հայտնեց հասարակագետը:
