Ադրբեջանական ANS PRESS-ի փոխանցմամբ՝ սեպտեմբերին Լեհաստանում կայանալու է «Արևելյան գործընկերություն» ծրագրի մասնակից երկրների ղեկավարների հանդիպումը, որին մասնակցելու հրավեր է ստացել Ադրբեջանի նախագահ Իլհամ Ալիևը։ Այս մասին լրագրողներին հայտնել է Ադրբեջանում ԵՄ ներկայացուցիչ Ռոլանդ Կոբիան։
Վերջինս նաև նշել է, որ ԵՄ-ի արտաքին քաղաքական և անվտանգության հարցերով հանձնակատար Քեթրին Էշթոնը ցանկանում է այցելել Ադրբեջան, քանի որ համարում է, որ Հարավային Կովկասը կարևոր տարածաշրջան է, որն ունի ռազմավարական նշանակություն։
Առայժմ հայտնի չէ, թե երբ տեղի կունենա Էշթոնի ադրբեջանական այցը։ Այցի ժամանակ քննարկվելու է Ադրբեջանի քաղաքական դրությունը, ինչպես նաև «Արևելյան գործընկերություն» ծրագիրը և եվրոպական հարևանության քաղաքականությունը:
Հիշեցնենք, որ «Արևելյան գործընկերություն» ծրագիրը միտված է նրան, որ ԵՄ-ին է՛լ ավելի մերձեցնի Հայաստանին, Ադրբեջանին, Վրաստանին, Մոլդովային, Բելառուսին և Ուկրաինային։ Թեև այն չի ենթադրում ԵՄ-ին անդամակցություն, այնուամենայնիվ նախատեսում է քաղաքական և տնտեսական մերձեցում։ Այս ծրագրի մեկնարկը տրվեց 2009 թվականի մայիսի 7-ին Պրահայում կայացած ԵՄ գագաթնաժողովում։