Բելառուսի նախագահ Ալեքսանդր Լուկաշենկոն Բաքու կատարելիք երկօրյա այցի ընթացքում Ադրբեջանի նախագահ Իլհամ Ալիևի հետ կքննարկի տարբեր ոլորտներում համագործակցության զարգացմանն առնչվող հարցեր: Այս մասին հայտնում է ITAR-TASS-ը՝ հղում անելով Բելառուսի ղեկավարի մամլո ծառայությանը:
Բանակցությունների արդյունքներով նախատեսվում է ստորագրել տարբեր ոլորտներում համագործակցության մի շարք երկկողմ փաստաթղթեր:
Պաշտոնական տվյալներով՝ 2006-2012 թվականներին երկու երկրների միջև ապրանքաշրջանառությունը մեծացել է 6 անգամ և անցած տարվա արդյունքներով կազել 223.3 մլն դոլար: Այս տարվա հունվար-սեպտեմբերին ապրանքաշրջանառությունը հասել է 216 մլն դոլարի, ըստ այդմ՝ բելառուսական կողմի արտահանումն ավելացել է 1.6 անգամ:
Ինչպես այցի նախօրեին լրագրողներին հայտնել է Ադրբեջանում Բելառուսի դեսպան Նիկոլայ Պացկևիչը, առաջիկա տարիներին երկրները կարող են զգալիորեն ավելացնել առևտրա-տնտեսական համագործակցության ծավալները:
Ադրբեջանում հավաքվում են բելառուսական տրակտորներ, բեռնատար մեքենաներ, կոմունալ տեխնիկա, օպտիկական սարքավորումներ, ջահեր ու վերելակներ: Ինչպես կարծում է դեսպանը, բելառուսական տեխնոլոգիաներն ու տեխնիկան կարող են նաև լայնորեն պահանջվել Ադրբեջանի գյուղատնտեսության ոլորտում: Նրա խոսքով՝ Բելառուսում տեխնիկայի խոշորագույն արտադրող «Ամկոդոր» ընկերությունը հաղթել է մելիորացիայի համար տեխնիկայի մատակարարման իրավունքի համար մրցույթում և մինչև տարեվերջ կմատակարարի 80 էքսկավատոր:
Հոկտեմբերի վերջին ԱՊՀ երկրների ԶԼՄ-ների ղեկավարների հետ հանդիպմանը Լուկաշենկոն հայտարարել էր, որ Բելառուսն Ադրբեջանի հետ փակ թեմա չունի: «Երբ Բաքու այցելեմ, կերկխոսենք բոլոր ուղղություններով՝ ռազմատեխնիկական ոլորտում համագործակցությունից մինչև էներգետիկ հարցեր»,- ասել էր նախագահը:
