Այսօր Ազգային ժողովում աշխատանքներն սկսեց «Իրականություն դարձնել ամենախոցելի երեխաների իրավունքները» տարածաշրջանային խորհրդարանական համաժողովը: Համաժողովին բացման խոսքով հանդես եկան ԱԺ փոխնախագահ Սամվել Նիկոյանը, միջխորհրդարանական միության գլխավոր քարտուղար Ա.Ջոնսոնը և ՅՈՒՆԻՍԵՖ-ի հայաստանյան գրասենյակի ներկայացուցիչ Լ.Մոշիրին:
Հիմնական զեկույցով հանդես եկավ Նորվեգիայի երեխաների իրավունքների հարցերով նախկին օմբուդսմեն Տ.Վաագեն՝ «Ամենախոցելի երեխաների իրավունքների պահպանումը. ձեռքբերումները և մարտահրավերները»: Նրա խոսքով՝ վերջին 21 տարիներին երեխաների իրավունքների պաշտպանության հետ կապված հարցերը դարձել են Եվրոպայում ամենասուր բանավեճերի և քննարկումների առարկա:
Աստիճանաբար փոխվում է երեխաների նկատմամբ վերաբերմունքը: Որպես ընտանիքի սեփականություն հանդիսացողներից՝ նրանք աստիճանաբար սկսում են ընկալվել որպես որոշումների կայացման վրա կարևոր ազդեցություն ունեցող մարդիկ, որոնք ունեն բազմաթիվ իրավունքներ՝ սկսած կրթության իրավունքից: