Հաջորդ շաբաթ մի շարք ուշագրավ զարգացումներ են նախատեսված Ադրբեջանում, որոնք իրենց կարևորությամբ ռեգիոնալ ընդգրկուն նշանակություն ունեն: Մարտի 15-ին Բաքվում սպասվում է Իրանի, Թուրքիայի, Ադրբեջանի և Վրաստանի արտաքին գործերի նախարարների հանդիպում: Դեռևս հստակ մանրամասներ չկան, թե ինչ օրակարգով է ընթանալու հանդիպումը, բայց կարող ենք պնդել, որ հանդիպման փաստն ինքնին աննախադեպ է:
Մի բան համոզված կարող ենք ասել, որ վերջին տարիներին Ադրբեջանի արտաքին քաղաքական մի շարք նախաձեռնություններ հատում են Հրվ. Կովկասի սահմանները՝ ավելի մեծ ռեգիոնալ հավակնություններով: Հաջորդ կարևոր իրադարձությունը, որ առանձնացրել ենք մարտի 12-ից 17-ը անցկացվելիք Ադրբեջանի զինված ուժերի զորավարժություններն են, որին ըստ պաշտոնական հաղորդագրության մասնակցելու է շուրջ 25 հազար մարդ: Այս և տարածաշրջանային կարևորության մի շարք թեմաների շուրջ զրուցելու ենք քաղաքագետ, Միջազգային և անվտանգության հարցերով հայկական ինստիտուտի ասոցացված փորձագետ Գևորգ Մելիքյանի հետ:
Անդրադառնալով Իրանի, Թուրքիայի, Ադրբեջանի և Վրաստանի արտաքին գործերի նախարարների նախատեսվող հանդիպմանը, որը կայանալու է մարտի է 15-ին Բաքվում և այս համատեքստում պաշտոնական Երևանի անելիքներին՝ մեր զրուցակիցը նշեց, որ Հայաստանը, վստահաբար, պետք է ակտիվացնի իր արտաքին քաղաքականությունը, որի մասին բազմիցս ասվել է: «Բայց դրա համար պետք է հասկանալ այն գործընթացները, որոնց Հայաստանը տիրապետում է կամ չի տիրապետում, այս տարածաշրջանը նստած չի սպասում, թե երբ պետք է Հայաստանն արթնանա թմբիրից կամ որոշի իրականացնել ինչ որ մի պրոյեկտ: Բնականաբար, արտաքին քաղաքականության ասպարեզում, միջազգային հարաբերություններում վակուումներ չեն լինում, ինչպես և բիզնես միջավայրում»:
Մելիքյանի դիտարկմամբ՝ Հայաստանը փորձում է միայն և միայն հանդես գալ տարբեր ծրագրերով, որոնք գլոբալ առումով դեռևս մինչև օրս մնում են միայն թղթի վրա. պատճառները տարբեր են՝ քաղաքականից սկսած մինչև ֆինանսական: «Հայաստանում արդյունավետ կառավարման լուրջ խնդիր կա, և առանց այդ հիմնարար խնդիրները լուծելու հնարավոր չէ կուտակել այնպիսի գումարներ, որոնք հնարավորություն կտան իրականացնել այդ ծրագրերը»,-ասաց նա:
Այն հարցին, թե ինչ նպատակ են հետապնդում Ադրբեջանի զինված ուժերի լայնամասսշտաբ զորավարժությունները, որոնք անցկացվելու են մարտի 12-17-ը, փորձագետը պատասխանեց, որ պաշտոնական Բաքուն փորձում է ցուցադրել իր մկանները և ցույց տալ, որ պատրաստ չէ Հայաստանի հետ նստել բանակցային սեղանին խնդրողի դիրքերից: «Պետք է հասկանանք, որ Ադրբեջանը չունի, չի ուզում կամ այլևս չի պատկերացնում՝ ինչպես պիտի խաղաղ լուծի այս խնդիրը: Սա շատ վատ իրավիճակ է, որին մենք հասել ենք»:
Նրա խոսքով՝ շատ կարևոր է, որպեսզի Հայաստանը հստակ աշխատի Ռուսաստանի հետ: «Անըդհատ և անընդհատ Հայաստանը մեղավորներ է փնտրում աշխարհի բոլոր ծայրերում, բացի Ռուսաստանում, Բաքվի գործողությունների համար մեղադրում են Անկարային, բայց ոչ երբեք Մոսկվային, Մոսկվան է զինում Ադրբեջանին և տպավորություն է, որ Կովկասը Ռուսաստանի համար դառնում է կոլիզեյ, որտեղ որ գլադիատորները պետք է կռվեն»,-նշեց Մելիքյանը՝հավելելով, որ ամեն ինչ այդքան էլ միանշանակ չէ, խնդիրն այստեղ Ռուսաստանին մեղադրել կամ չմեղադրելը չէ:
Մեր զրուցակցի դիտարկմամբ՝ Հայաստանը պետք է հնարավորություն չտա Ադրբեջանին շատ հանգիստ, առանց խնդիրների ուղղակի ի ցույց դնել իր զենքերը, զինված ուժերի հնարավորությունները՝ դա անելով ցանկացած պահի, ցանկացած ժամանակ, երբ հարմար է գտնում:
Առավել մանրամասն՝ տեսանյութում:
