Միխեիլ Սաակաշվիլին, ով նոյեմբերի 17-ին վայր է դրել նախագահի լիազորությունները, The New York Times-ի հետ կիսվել է Վրաստանի ու նրա ապագայի մասին իր գաղափարներով, հրաժեշտ տվել երկրի նոր ղեկավարությանը, ինչպես նաև պատմել իր ղեկավարման օրոք ընդունված այն որոշումների մասին, որոնց համար զղջում է:
Չնայած մեդիադաշտում շրջանառվող Ռուսաստանի կարծիքին, թե Սաակաշվիլին ԱՄՆ-ի դրածոն է, նա խորին հիասթափություն է հայտնել Հարավային Կովկասում ԱՄՆ-ի քաղաքականության առնչությամբ: Նա նաև մտավախությամբ է հանդես եկել սիրիական հարցի շուրջ ԱՄՆ-ի որոշումների հարցում: Վրաստանի նախկին նախագահը կարծում է, որ ԱՄՆ-ը թուլություն է դրսևորել՝ հրաժարվելով Սիրիայում ուղիղ օպերացիայից, և Ռուսաստանը կարող է դա ընկալել որպես քարտ-բլանշ՝ Անդրկովկասում գործողությունների լիարժեք ազատության համար: Սաակաշվիլին հայտարարել է, որ Ռուսաստանի նախագահ Վլադիմիր Պուտինը «գրեթե կամ միանգամայն վստահ է, որ ինչ էլ անի՝ կտրի Վրաստանի խողովակաշարը, օկուպացնի Թբիլիսին, տապալի ադրբեջանական ղեկավարությունը՝ ոչ ոք ոչինչ չի ձեռնարկի՝ մի քանի աղմկալի հայտարարություններից ու դատապարտումներից բացի»:
Նոր նախագահ Գեորգի Մարգվելաշվիլիի երդմնակալությունը վատ չի արտացոլում տարածաշրջանում խնդիրների հանդեպ Վաշինգտոնի բացակայությունը՝ կարծում է Սաակաշվիլին. «Ամերիկյան պատվիրակությունը կազմված է եղել «ցածրաստիճան» պաշտոնյաներից և ակնհայտ ձևական բնույթ կրել»:
Սաակաշվիլին ափսոսանք է հայտնել իր կողմից ընդունված մի շարք որոշումների առնչությամբ: Նա կարծում է, որ ոչ բավարար թվով վրացի երիտասարդների է ուղարկել ԱՄՆ և Եվրոպա՝ կրթություն ստանալու: «Ինչպես ես հիմա կցանկանայի, որպեսզի մենք պաշտպանության վրա ծախսեինք մեկ միլիարդ պակաս, իսկ կրթության վրա՝ մեկ միլիարդ ավելի: Դա ավելի լավ պաշտպանություն կլիներ, քան այդ ողջ սպառազինության գնումը, որը միևնույն է՝ անօգուտ է, երբ բանը հասնում է Ռուսաստանի հետ հակամարտությանը»,- նախկին նախագահի խոսքերն է փոխանցում պարբերականը:
