Երեկ Իտալիայում կայացած հանրաքվեի ժամանակ, բացի ատոմակայանների վերաբերյալ հարցից, իտալացիներին առաջարկվել էր պատասխանել այն հարցին, թե արդյոք պետական բարձր պաշոնյաներն իրավունք ունե՞ն չներկայանալու դատարան, ինչն ամրագրված է օրենքով: Իտալացիների մեծամասնությունը երեկ բացասական պատասխան է տվել այդ հարցին և, փաստացի, զրկել կառավարության անդամներին դատարան չներկայանալու իրավունքից: Այս մասին հաղորդում է France Presse գործակալությունը:
Հանրաքվեին մասնակցածների մոտ 90%-ը կողմ է քվեարկել պաշտոնյաներին այդ իրավունքից զրկելու հարցին: Սա նշանակում է, որ վարչապետ Սիլվիո Բեռլուսկոնին, որի դեմ բազմաթիվ քրեական գործեր են հարուցված, ինչպես նաև ընթանում են դատավարություններ, հիմա ստիպված է լինելու կանգնել դատարանի առաջ և ներկա լինել դատական նիստերին, ինչից մինչ այդ խուսափում էր:
Չնայած կառավարության՝ հանրաքվեի չգնալու կոչերին, դրան մասնակցեց իտալացիների 57%-ը, իսկ քվորումը հանրաքվեի ժամանակ հնարավոր եղավ հաղթահարել առաջին անգամ՝ սկսած 1995 թվից:
Հիշեցնենք, որ երեկ իտալացիները նաև կողմ են արտահայտվել միջուկային էներգիայից հրաժարվելուն: