«Առաջին լրատվական»-ի տեղեկություններով՝ Ազգային ժողովի նախագահ Հովիկ Աբրահամյանը նախատել է Հանրապետական կուսակցության պատգամավոր Կարինե Աճեմյանին այն բանի համար, որ նա կոնֆլիկտ է հրահրել վերջին այցի առնչությամբ: Հիշեցնենք, որ Հ.Աբրահամյանի գլխավորած պատվիրակությունը նոյեմբերի 18-26-ը պաշտոնական այցով արդեն մեկնել է Բրազիլիա, Ուրուգվայ և Արգենտինա այդ երկրների խորհրդարանների նախագահների հրավերներով:
Իսկ մինչև այդ անցած շաբաթ հրպարակումներ եղան, որ ՀՀԿ խմբակցության կին պատգամավորների միջև կոնֆլիկտ կամ մրցակցություն է եղել պատվիրակության կազմում ընդգրկվելու համար: Թեթևակի բանավեճ եղել է հատկապես Կարինե Աճեմյանի և Մարգարիտ Եսայանի միջև: Եվ այդ բանավեճին միջանցքում հետևել են լրագրողները: Ներկայացվում էր, որ այս երկու կանայք հաճախ են Հ.Աբրահամյանին ուղեկցել այդ այցերի ժամանակ: Մ.Եսայանը, սակայն, առաջին անգամ է ընդգրկվել ԱԺ նախագահի ղեկավարած պատվիրակության կազմում: Պատգամավորն ինքն է այդ մասին լրագրողներին տեղեկացրել:
Նախօրեին Կ.Աճեմյանը լրատվամիջոցներից մեկին ասել էր, թե ինքը հրաժարվել է այդ ուղևորությունից: «Ուզում եմ տեղեկացնել, որ ես Բրազիլիա չեմ մեկնում, այնպես որ, ես կարդացի, թե պայքարողները շատ են, թող բոլորը գնան, ես չեմ գնում»,- նեղացկոտ տոնով ասել էր նա։
Իսկ մինչ այդ հրապարակումներ եղան, թե Հ.Աբրահամյանը հանդիպել է թե՛ Կ.Աճեմյանի, թե՛ պատվիրակության կազմում ընդգրկված այլ կանանց հետ: Եվ ԱԺ նախագահը բարկացել է հատկապես Կ.Աճեմյանի վրա ու նրան նախազգուշացրել միջանցքներում այլևս նման տեսարաններ չստեղծել: Վերջինս էլ վիրավորվել է ԱԺ նախագահի հանդիմանանքից, խռովել ու հրաժարվել այցից: «Դա ԱԺ նախագահի իրավունքն է: Ես ինքս հրաժարվել եմ, ես տեղյակ չեմ եղել, որ իմ անունը եղել է, բայց իմանալով այդ մասին՝ զանգել, հրաժարվել եմ, ես չեմ մեկնում»,- ասել է Կ.Աճեմյանը:
Հ.Աբրահամյանի հետ էկզոտիկ երկրներ մեկնել են Դավիթ Հարությունյանը, Արտակ Դավթյանը, Նաիրա Զոհրաբյանը, Արմեն Ռուստամյանը, Հեղինե Բիշարյանը, Մարգարիտ Եսայանը, Սամվել Ֆարմանյանը, Ռուզաննա Մուրադյանը, Ռուբիկ Հակոբյանը, Տաճատ Վարդապետյանը: Ավելացնենք նաև, որ վերջերս Հ.Աբրահամյանն իր գլխավորած պատվիրակության մեջ չի ընդգրկում Արփինե Հովհաննիսյանին: ԱԺ նախագահն այդպիսով փորձում է Ա.Հովհաննիսյանին զերծ պահել նրա անունը իր հետ կապելու խոսակցություններից:
