Քաղաքական գործընթացներն ընթանալու են Վիլնյուսից հետո: «Առաջին լրատվական»-ի հետ զրույցում այս մասին ասաց «Կովկաս» ինստիտուտի տնօրեն, քաղաքական վերլուծաբան Ալեքսանդր Իսկանդարյանը՝ անդրադառնալով նոյեմբերի վերջին Վիլնյուսում կայանալիք գագաթնաժողովին:
Նա նշեց, որ Հայաստանը Վիլնյուսում կանի այն, ինչ կանի, այսինքն՝ ՀՀ-ԵՄ հարաբերությունների այն մակարդակը, որը ներկայում հնարավոր է, կֆիքսվի, քանի որ աշխատանք է կատարվել, որը շարունակվել է երեք տարի, եղել է փաստաթուղթ, և այն լավն է եղել՝ երկու կողմերն էլ դա ընդունել են: Ըստ քաղաքագետի՝ թեև ներկայումս դա հնարավոր չէ գործի դնել, բայց կֆիքսենք այն և իրավիճակը կփոխադրենք stand-by վիճակ, հետո կսպասենք, թե ինչ կլինի:
«Վիլնյուսից հետո, երբ որոշվի Ուկրաինայի հարցը, երբ անցնի Սոչիի օլիմպիադան, կփոխվի եռանկյունու ուժերի հակազդեցությունը և փոխազդեցությունը, կկառուցվի նոր քաղաքականություն, և Հայաստանը չի դադարեցնի իր համագործակցությունը Եվրոպայի հետ. այդ մասին խոսակցությունները լուրջ չեն: Հայաստանը կպահպանի իր կոմպլեմենտար քաղաքականությունը, կրկնեմ՝ այն մակարդակով, որը հնարավոր կլինի այդ պահին:
Եվրոպան ևս չի հեռանա Հայաստանից. դա իրատեսական չէր լինի: Նույնը վերաբերում է նաև Ուկրաինային, Վրաստանին և Մոլդովային: Ինչպես կշարունակվի համագործակցությունը, ինչ ֆորմատով, որքան խորը՝ այս ամենը կհստակեցվի Վիլնյուսից հետո: Նույնը վերաբերում է նաև Ռուսաստանին: ՀՀ-ՌԴ փոխհարաբերությունների ձևաչափը ևս կհստակեցվի Վիլնյուսից հետո, և կհստակեցվի այն մակարդակով, որը հնարավոր կլինի այդ ժամանակ»,- ասաց Ալեքսանդր Իսկանդարյանը:
Դիտարկմանը, թե այդ զարգացումները կախված են ՄՄ վերաձևավորման աշխատանքների՞ց, արձագանքեց՝ ասելով, թե վստահ չէ, որ ՄՄ-ն գոյություն է ունենալու 5-6-7 տարի հետո, ավելին՝ վստահ չէ, որ Հայաստանը լինելու է ՄՄ-ի ֆորմալ անդամ, և վստահ չէ նաև, որ եթե նույնիսկ լինի այդ միության ֆորմալ անդամ, ապա կլինի ռեալ անդամ: Նրա գնահատմամբ՝ այդ ամենը պարզ կդառնա Վիլնյուսից հետո, քանի որ դա քաղաքական գործընթաց է, որի արդյունքում կորոշվի փոխհարաբերությունների եղանակը:
«Այս խաղը դեռ խաղացված չէ: Ընդունվել էին քաղաքական որոշումներ, սեպտեմբերի 3-ին քաղաքական գործիչների կողմից Մոսկվայում կայացվել է քաղաքական որոշում, հիմա սա կիջեցնեն ներքև և կորոշեն, թե ինչպես կարելի է համատեղել Հայաստանի ու Ղազախստանի հետաքրքրությունները, Հայաստանի ու Ռուսաստանի հետաքրքրությունները, երբ նրանց միջև Վրաստանն է, ինչպես հարաբերվել ԵՄ-ի հետ, երբ ԽՀԱԱԳ պայմանագիրը չի ստորագրվել: Սա քաղաքականության շարունակություն է: Վիլնյուսից հետո դեռ կյանք է լինելու, և լինելու է քաղաքականություն:
Վիլնյուսը ընկալվում է որպես բախտորոշ, բայց մենք միացել եք ՄԱԿ-ին, ՀԱՊԿ-ին, Եվրոպայի խորհրդին, միացել ենք հարևանության քաղաքականությանը, Արևելյան գործընկերությաը, մենք միանալու ենք էլի տարբեր կազմակերպությունների, գործընթացը գնում է և գնալու է, այդ թվում՝ Վիլնյուսից հետո»,- ասաց Ալեքսանդր Իսկանդարյանը:
Առաջարկում ենք Ալեքսանդր Իսկանդարյանի հետ «Առաջին լրատվական»-ի ավելի ընդարձակ հարցազրույցին ծանոթանալ տեսանյութի միջոցով:
