Երևանի ավագանու վերջին նիստում տեղի ունեցած միջադեպը, որի ժամանակ ավագանու «Ելք» խմբակցության անդամները իրար ծեծողներին բաժանողի դերում էին և միջադեպից հետո հանդես եկան ի պաշտպանություն «Երկիր Ծիրանի» խմբակցության, թերևս «չեն մարսի» իրենց քայլը, քանի որ ՀՀԿ-ն որոշել է ցույց տալ, որ «Ելք»-ը միշտ չէ, որ կարող է կողմ լինել «Երկիր Ծիրանիի» քայլերին։
Մասնավորապես, «Առաջին լրատվական»-ի տեղեկություններով՝ Տարոն Մարգարյանը որոշել է ավագանու «Երկիր Ծիրանի» խմբակցության՝ Վազգեն Սարգսյանի անվան փողոցը վերանվանելու նախագիծն ընդգրկել ավագանու առաջիկա նիստի օրակարգ։
Հիշեցնենք, որ դեռևս փետրվարի 1-ին Երևանի ավագանու «Երկիր Ծիրանի» խմբակցությունը հանդես էր եկել ԱՄՆ 28-րդ նախագահ Վուդրո Վիլսոնի անվամբ փողոց անվանակոչելու և հուշարձանը տեղադրելու մասին իրավական ակտ ընդունելու նախաձեռնությամբ, ըստ որի, առաջարկվում էԿենտրոն վարչական շրջանի Վազգեն Սարգսյանի անվան փողոցի՝ Հանրապետության հրապարակի Հակոբ Պարոնյանի անվան երաժշտական կոմեդիայի պետական թատրոնից դեպի ՀՀ արտաքին գործերի և ՀՀ արդարադատության նախարարություններ տանող հատվածը վերանվանել Վուդրո Վիլսոնի անվամբ՝ հիմնավորմամբ, որ Վուդրո Վիլսոնը առավել հայտնի է Սևրի դաշնագրից բխող՝ 1920 թվականի նոյեմբերի 22-ի իր Իրավարար վճռով, որով անկախ Հայաստանին էր վերամիավորվում Արևմտյան Հայաստանի շուրջ 90 հազար քառակուսի կմ տարածք՝ դեպի ծով ելքով:
Բնական է, որ ՀՀԿ խմբակցությունը ողջ կազմով դեմ է քվեարկելու Վազգեն Սարգսյանի անվան փողոցը վերանվանելու «Երկիր Ծիրանիի» առաջարկին։ Այդ առաջարկին կողմ չի քվեարկելու նաև «Ելք» խմբակցությունը և դա տրամաբանական էլինելու, քանի որ Միկոյանի, Կասյանի և այլ բոլշևիկների անուններով փողոցները թողած, Զարուհի Փոստանջյանի խմբակցությունը որոշել է վերանվանելու առաջարկ ներկայացնել Վազգեն Սարգսյանի անվան փողոցի մասով։
Այսինքն՝ այս հարցը օրակարգ բերելով և երկու խմբակցությունների՝ ՀՀԿ-ի ու «Ելք»-ի կողմից քվեարկությամբ մերժելով, Տարոն Մարգարյանը երկու խնդիր է լուծում։
«Ելք» խմբակցության ղեկավար Դավիթ Խաժակյանը «Առաջին լրատվական»-ի հետ զրույցում ասաց, որ նախ ավագանու առաջիկա նիստի օրակարգը դեռևս հայտնի չէ և պարզ չէ, թե այդ հարցը ընդգրկվելո՞ւ է ավագանու առաջիկա օրակարգ, թե՞ 4 ամիս հետո, բայց կանխատեսելով, որ կարող է առաջիկա նիստում ընդգրկվել հարցը, առաջիկայում «Ելք» խմբակցությունըկքննարկի հարցը և դիրքորոշում կհայտնի քվեարկության վերաբերյալ։ «Բայց խոսքը գնում էՎազգեն Սարգսյանի անվան փողոցի վերանվանման մասին, ինչի շուրջ, բնական է, որ տրամադրությունները բացասական են։ Երբ մենք խմբակցության նիստ կհրավիրենք և հստակ որոշում կկայացնենք, այդ ժամանակ էլմեկնաբանություններ կլինեն»,-ասաց Խաժակյանը։
Մեր դիտարկմանը՝ իսկ ինչպես են արձագանքում այն հարցին, որ Տարոն Մարգարյանը այդպիսով փորձում է խնդիր լուծել և ցույց տալ, որ կան հարցեր, որոնց շուրջ ՀՀԿ-ն ու «Ելք»-ը համակարծիք են, Խաժակյանը պատասխանեց. «Ես երբևէ չեմ մտածել, թե այս կամ այն հարցով Տարոն Մարգարյանը ինչ խնդիր է լուծում, և իմ գործողությունները դրանով չեմ պայմանավորել։ Մեր խմբակցությունը նույնպես այդպես է գործում։ Կրկնում եմ՝ օրակարգը դեռևս պարզ չէ, ձեր նշած հարցն էլ դեռևս օրակարգում չէ։ Բայց համեմատության համար նշել, որ փողոցների անվանափոխության վերաբերյալ մեր նախաձեռնությունը 3 ամիս սպասում էր օրակարգ ընդգրկվելուն և 3 ամիս ներքին քննարկումների փուլ անցավ։ Իհարկե, չեմ բացառում, որ հիմա Փոստանջյանի նախաձեռնությունը կմտնի օրակարգ, բայց քանի դեռ օրակարգում չէ, ձեռնպահ կմնանք մեկնաբանություններից»։