Ուկրաինայի և Հայաստանի կայացրած որոշումները ժամանակավոր են: Այս մասին այսօր «Առաջին լրատվական»-ի հետ զրույցում ասաց Միջազգային հարաբերությունների լեհական ինստիտուտի (Վարշավա) քաղաքական փորձագետ Կոնրադ Զաշտովտը՝ խոսելով երեկ Ուկրաինայի նախագահ Վիկտոր Յանուկովիչի՝ Վիլնյուսյան գագաթնաժողովին ընդառաջ կայացրած որոշման և ԵՄ հարևանության քաղաքականության արդյունավետության շուրջ:
Նա նշեց, որ փաստորեն փոխվում է Վիլնյուսում կայանալիք «Արևելյան գործընկերության» գագաթնաժողովի օրակարգը, որի ընթացքում Մոլդովան և Վրաստանը կնախաստորագրեն Ասոցացման համաձայնագիրը՝ Խորը և համապարփակ ազատ առևտրի գոտու պայմանագրի հետ, որից հետո պետք է դեռևս սպասել մեկ տարի, քանի որ այդ տարվա ընթացքում շատ բան կարող է պատահել: Փորձագետի խոսքով՝ չի կարելի բացառել, որ ապագայում Ռուսաստանը խոչընդոտներ կհարուցի Մոլդովայի և Վրաստանի համար:
Լեհ փորձագետը չի կարծում, որ Վիլնյուսյան գագաթնաժողովը ավելի փոքր նշանակություն կունենա, և որ «Արևելյան գործընկերության» ծրագիրը նախաձեռնող ԵՄ երկրները տապալել են հարևանության քաղաքականությունը:
««Արևելյան գործընկերությունը» սկսվել է մի քանի տարի առաջ՝ 2009 թ., և այդ ծրագրի էությունը ներքին բարեփոխումներն են ԱԳ երկրներում, և այդ բարեփոխումները դանդաղ են ընթանում, բայց առաջընթաց ամեն դեպքում կա: Իհարկե, դա կախված է նաև երկրից, որովհետև մենք տեսնում ենք ավելի մեծ առաջընթաց Մոլդովայում, Վրաստանում, իսկ Ուկրաինայի պարագայում բարդ է: Դա բացատրվում է այդ երկրի մեծությամբ, այնտեղ ռեֆորմներ իրականացնելը ավելի բարդ է, քան փոքր երկրներում: Ես համաձայն եմ, որ կարելի է այս ամենը դիտարկել աշխարհաքաղաքականության կոնտեքստում, բայց ես կնախընտրեի հենց ուշադրություն դարձնել ներքին փոփոխությունների վրա: Դրանք կլինեն, և այդ երկրների ղեկավարները կստորագրեն ու կնախաստորագրեն Վիլնյուսում, քանի որ դա են պահանջում այդ երկրների հասարակությունները: Ես կարծում եմ, որ ԵՄ-ն չի կարող ստիպել ԱԳ երկրներին որոշումներ կայացնել, դրանք անկախ երկրներ են, և իրենք պետք է որոշեն ուր և որտեղ ինտեգրվել: ԵՄ-ն կարող է միայն առաջարկել, բայց դրանից հնարավոր է հրաժարվել»,- նման տեսակետ հայտնեց Կոնրադ Զաշտովտը:
Վերջինիս կարծիքով՝ Հայաստանի կայացրած որոշումը բացասականորեն անդրադարձավ Ուկրաինայի ղեկավարության որոշման վրա: Բայց, լեհ փորձագետի համոզմամբ, սա ժամանակավոր է, այս երկրների ղեկավարները կջանան շարունակել մերձենալ ԵՄ-ի հետ՝ անկախ մինչ Վիլնյուսը կայացված որոշումներից:
