«Առաջին լրատվական»-ի տեղեկություններով՝ աշխատանքի և սոցիալական հարցերի նախարար Արտեմ Ասատրյանը մտադիր է վեր հանել և ստուգել նախարարության հին թղթաբանությունը: Խոսքը վերաբերում է նախարարության գործունեության այն շրջանին, երբ այդ գերատեսչության ղեկավարներն էին «Բարգավաճ Հայաստան» և Դաշնակցություն կուսակցության անդամները:
Նախարարության մեր աղբյուրների փոխանցմամբ՝ Ա. Ասատրյանին բարկացրել են Կուտակային կենսաթոշակային համակարգի, գործազրկության նպաստների վերացմանն ու ընդհանրապես ոլորտում տեղի ունեցած խախտումներին ուղղված այդ երկու նույնանուն խմբակցությունների քննադատությունները:
Հիշեցնենք, որ նախորդ տարիներին աշխատանքի և սոցիալական հարցերի նախարարությունը կոալիցիոն քվոտայով պատկանել է նախ՝ ՀՅԴ-ին, ապա ԲՀԿ-ին: Եվ հատկապես ՀՅԴ-ի ղեկավարման տարիներին այդ նախարարությունում հարյուրավոր մլն դրամների աղմկոտ չարաշահումներ են բացահայտվել: Խոսքը վերաբերում է ՀՅԴ անդամ Աղվան Վարդանյանի՝ նախարար եղած տարիներին մանկատների երեխաներին բնակարաններով ապահովելու ծրագրում բացահայտված աղմկոտ չարաշահումներին և մի շարք այլ խախտումների:
Բացի այդ, կենսաթոշակների ոլորտում Վերահսկիչ պալատի կատարած բացահայտումների դեպքում, ճիշտ է, ողջ մեղադրանքը բարդվեց սոցիալական ապահովության հիմնադրամի նախկին նախագահ Վազգեն Խաչիկյանի վրա, բայց նախարարությունում պնդում են, որ այդ գերատեսչությունում նման երևույթներ տեղի են ունեցել նաև ՀՅԴ-ի և ԲՀԿ-ի ղեկավարման տարիներին:
Սոցապնախարարության աշխատակիցների փոխանցմամբ՝ Ա. Ասատրյանը հանձնարարել է վեր հանել նաև այդ շրջանների չարաշահումներից դեպքեր:
Կարծիք կա, որ Ա. Ասատրյանը շատ է վիրավորվել հատկապես ՀՅԴ պատգամավոր Արծվիկ Մինասյանի քննադատություններից: Եվ նա նախարարության աշխատակիցներին հանձնարարել է վեր հանել հատկապես այնպիսի խախտումներ, որոնք տեղի են ունեցել այն ժամանակ, երբ գերատեսչության նախարարը եղել է Ա. Վարդանյանը, փոխնախարար՝ Ա. Մինասյանը:
Մեզ փոխանցեցին նաև, որ թեև Ա. Մինասյանը չարաշահումների և խախտումների մասնակից չի եղել, բայց նրա ղեկավար Ա. Վարդանյանը երբեմն նրան հանձնարարել է նման երևույթների հետ կապված փաստաթղթեր պատրաստել:
Իսկ ինչ վերաբերում է ԲՀԿ-ին, ասում են, որ խախտումներ եղել են նաև այդ կուսակցության կողմից 2009-2012 թվականներին նախարարներ նշանակված Գևորգ Պետրոսյանի, ինչպես նաև Մխիթար Մնացականյանի և Արթուր Գևորգյանի ղեկավարման տարիներին:
