«Հրապարակ» օրաթերթը գրում է, որ ինչպես երևում է՝ ոչ միայն ՀՀԿ, այլև օրենսդիր մյուս տիկնանց սիրտն է Բրազիլիա ուզում: Օրենք գրելու հարցում «դորդուբեշ» արած տիկնայք ուզում են տեսնել իրենց սիրելի սերիալների ու կառնավալների երկիրը և ամեն ինչ անում են, որ հայտնվեն պաշտոնական պատվիրակության մեջ: Ինչպես հայտնի է, նոյեմբերի 17-ին ԱԺ նախագահ Հովիկ Աբրահամյանը պետք է պաշտոնական այցով մեկնի Բրազիլիա, Արգենտինա և Ուրուգվայ, և օրենսդիր կանայք իրար մազ են փիտում այդ պատվիրակության մեջ հայտնվելու ու պետության հաշվին ֆռֆռալու համար:
Իրավիճակն այնքան է լարվել, որ ԱԺ նախագահը երեկվա դրությամբ դեռ չէր հաստատել պատվիրակության կազմը. մեկին ընդգրկել, մյուսին չընդգրկել՝ կնշանակի դառնալ կանանց թշնամին: Նշենք, որ պատվիրակության ձևավորումը սահմանափակումներ չունի, այն ձևավորվում է ըստ այցի օրակարգի և հանդիպումների:
Երեկ թերթը տեղեկություններ է ստացել, որ Հովիկ Աբրահամյանն ուզում է մեծահոգություն դրսևորել և պատվիրակության կազմում ընդգրկել պայքարող բոլոր տիկնանց, որ չկռվեն ու գնացողներին չանիծեն: Դե, հո իր գրպանի՞ց չի տանում՝ պետբյուջեն սաղ լինի: Թերթի տեղեկություններով, նա երեկ ԱԺ-ում ՀՀԿ կին պատգամավորներին հանգստացրել է, թե՝ «բոլորիդ էլ տանելու եմ հետս»: Ըստ որոշ տեղեկությունների, այդ պատվիրակության կազմում, բացի ՀՀԿ կանանցից՝ Կարինե Աճեմյան, Մարգարիտ Եսայան, Ռուզաննա Մուրադյան, կընդգրկվեն նաև Հեղինե Բիշարյանը, Նաիրա Զոհրաբյանը:
