Թատերագետ Լևոն Մութաֆյանը կարծում է, որ մրցանակների շնորհումը ոչ միշտ է օբյեկտիվ: Նոյեմբերի 14-ին լրագրողների հետ հանդիպմանը թատերագետը նշեց, որ երիտասարդ սերունդը շատ ավելի տաղանդավոր է, քան 70-80-ականներին էր: Մութաֆյանն անդրադարձավ «Ութ սիրագորով կանայք» ներկայացմանը, կարծիք հայտնեց, որ հնացած ներկայացումը բեմադրել են:
«Գարշելի ներկայացում, որ պետական մրցանակի են ներկայացրել: Թատրոնն այսօր ՊՈԱԿ է, որը ղեկավարում են տնօրենները, իսկ դրանք կարող են լինել ապաթատերական մարդիկ. գեղարվեստական ղեկավարի ինստիտուտը վերացել է, դրանք դարձել են կցորդներ: Իմ պիեսը ներկայացված էր հանրապետության նախագահի մրցանակին, այն մեկն է, բայց ամեն տարի ստանում են նկարիչներ, չգիտես ինչու, որովհետև հանձնաժողովի 9 անդամից 7-ը նկարիչ են: Այս տարի եղել է նաև երկրորդ մրցանակ, որ նորից նկարիչ է ստացել»,- ասաց նա:
Լրագրողների դիտարկումը՝ այսինքն՝ ինքը մերժվա՞ծ է, դուր չեկավ Մութաֆյանին, որը խնդրեց «չծռել» իր խոսքը, նշեց, որ խոսքն իր անձին չի վերաբերում: Նա պարզապես նշեց, որ 13 տարի է արդեն՝ թատերական ոլորտի ներկայացուցիչներին հանրապետության նախագահի մրցանակ չի շնորհվել:
Թատերագետը նկատեց՝ մարդիկ ասում են, որ հաճախում են թատրոն, բայց երբեմն դժվարանում են անգամ հիշել՝ երբ են գնացել, ինչ ներկայացում են դիտել: «Բիշարյան Հեղինեին (իմ ուսանողն էր) մի օր հարցրի՝ թատրոն գնո՞ւմ եք, ասաց՝ հա, իհարկե: Ասացի՝ ո՞ր թատրոնն եք գնում, ասաց՝ էն, որ օպերայի մոտերքն է»,- հիշեց Մութաֆյանը:
