Հրաչ Մուրադյանի սպանության գործի նախաքննությունը մտել է փակուղի. Պռոշյան համայնքի նախկին ղեկավար Հրաչ Մուրադյանի սպանության գործով կալանավորված Արայիկ Պետրոսյանն արդեն ութ ամիս առանց հիմնավորման պատանդ է պահվում: Այսօր լրագրողների հետ հանդիպմանը Հրաչ Մուրադյանի սպանության գործով կալանավորված Արայիկ Պետրոսյանի պաշտպաններ Նորայր Նորիկյանը և Գիվի Հովհաննիսյանը հայտարարեցին, որ գործի քննության այս ընթացքն իրենց մտահոգում է: Նրանք կասկածներ հայտնեցին, որ նախաքննությունը կամ փակուղի է մտել, կամ դիտավորյալ ձգձգվում է:
«Արդեն վեցերորդ անգամ նախաքննության մարմինը նույն պատճառաբանությամբ հանդես է գալիս կալանքի ժամկետը երկարացնելու միջնորդությամբ, ինչը դատարանը բավարարում է»,-ասաց Նորիկյանը։
Նա տեղեկացրեց, որ նախօրեին հերթական որոշումն է եղել՝ կալանքի ժամկետը ևս երկու ամսով երկարացնելու վերաբերյալ, և Արայիկ Պետրոսյանը «Կենտրոն» ՔԿՀ-ից տեղափոխվել է «Նուբարաշեն»։
Նորիկյանը հայտնեց, որ այսքան ժամանակ որևէ ողջամիտ փաստ չի ներկայացվում։ Նշվում է, որ Արայիկ Պետրոսյանը ևս ունի սպիտակ գույնի «Նիվա» մակնիշի մեքենա. միակ հիմքը դա է, բայց խնդրո առարկա մեքենայի պետհամարանիշը սկսվել է երեք թվով, իսկ իրենց պաշտպանյալի մեքենան՝ երկու թվով։
Պաշտպաններն արդեն նամակ են հղել Գլխավոր դատախազին, որում հայտնել են իրենց բոլոր մտահոգություները և խնդրել հանդիպում: Պետրոսյանի հայրը դիմել է նաև ԱԺ խմբակցություններին։
Պաշտպան Գիվի Հովհաննիսյանը նշեց, որ իրենք նորանշանակ Գլխավոր դատախազից ակնկալում են որևէ արձագանք: Թեև պաշտպաններն արդարադատության հետ հույսեր չեն կապում, սակայն անհրաժեշտության դեպքում կդիմեն թե վերաքննիչ, թե վճռաբեկ դատարաններին, որպեսզի հետագայում հնարավորություն ունենան դիմել նաև Եվրադատարան:
«Ակնհայտ անմեղ մարդու մասին է խոսքը, հասկացանք՝ սպանություն է, որոշակի ժամանակ պահեցիք, հիմա էլի երկարացնելը, այն էլ՝ երկու ամսով, ի՞նչ նպատակ է հետապնդում, ի՞նչ խաղեր են սրանք՝ չեմ հասկանում»,- ասաց նա։
Պաշտպաններն ընդգծում են՝ Հրաչ Մուրադյանն ու Արայիկ Պետրոսյանը ոչ միայն գործընկերներ էին, այլև ընտանիքներով էին լավ հարաբերությունների մեջ:
Պաշտպաններին հետաքրքրում է՝ գործի քննության համար ստեղծված խումբն ինչո՞ւ է մեկ ամսում ընդամենը 5 մարդու քննել. սա որևէ կերպ չի տեղավորվում նրանց որդեգրած ողջամտության քաղաքականության սահմաններում, նշանակում է՝ խմբից յուրաքանչյուրն ամսական աշխատել է մի քանի ժամ:
Լուսանկարը՝ shamshyan.com-ի
