Անվտանգության հարցերով Մյունխենի համաժողովին գերմանական պատվիրակության անդամ, Բունդեսթագի պատգամավոր Ջեմ Օզդեմիրին կցվել է ոստիկանական թիկնազոր: Այս մասին հայտնում է Welt am Sonntag-ը: Ոստիկանները սկսել են ուղեկցել գերմանացի քաղաքական գործչին երեկ առավոտյան, երբ նա դուրս է եկել Sofitel հյուրանոցի իր համարից: Welt am Sonntag-ն ընդգծում է, որ ոստիկանությունը հաստատել է այդ տեղեկատվությունը:
Նման միջոցառումը իրավապահներն անհրաժեշտ են համարել այն բանից հետո, երբ թուրքական պատվիրակության անդամները, որոնք նույնպես հանգրվանել էին Sofitel-ում, հայտարարել են, որ իրենց հետ նույն տանիքի ներքո է ապրում ահաբեկիչ՝ դրանում կասկածելով Օզդեմիրին:
Օզդեմիրը հայտնի է որպես Թուրքիայի նախագահ Էրդողանի քաղաքականության խիստ քննադատ՝ մասնավորապես քրդերի հարցով: Թուրքական պատվիրակության՝ ահաբեկչության մեջ Օզդեմիրի հասցեին մեղադրանքը փոքր-ինչ տարօրինակ է՝ նշում է Welt am Sonntag-ը: Բանն այն է, որ դեռ 1990-ական թվականներին Օզդեմիրին մի քանի տարի ուղեկցել է Քրեական գործերով դաշնային գերատեսչության անվտանգությունը՝ ոչ միայն թուրք ազգայնականների սպառնալիքների պատճառով, այլև Թուրքիայում և Գերմանիայում արգելված՝ Քրդստանի Աշխատավորական կուսակցության:
