Գործազրկության նպաստների տրամադրումը դադարեցնելը վարչապետ Տիգրան Սարգսյանը Բյուջե 2014-ի քննարկումների ժամանակ հիմնավորել էր այն հանգամանքով, որ դրանք անարդյունավետ են օգտագործվել, քանի որ 94% դեպքերում դրանք ստացել են ապահովված մարդիկ, որոնք աշխատանք չեն էլ փնտրել: Սարգսյանը նաև նկատել էր, որ փաստացիորեն այդ միջոցները չեն հասել շահառուներին և փոշիացվել են:
ԱԺ պատգամավոր, Ազատ դեմոկրատներ կուսակցության նախագահ Խաչատուր Քոքոբելյանն այսօր ԱԺ-կառավարության հարցուպատասխանի ժամանակ հիշեց վարչապետի այդ հիմնավորումները և հարց բարձրացրեց, թե արդյոք այդ հիմնավորումը բավարար պայման է գործազրկության նպաստների տրամադրումը դադարեցնելու համար, որովհետև այսօր ՀՀ-ում կան մարդիկ, որոնք բացառապես այդ 18 հազարով են հացի խնդիր լուծում:
Քոքոբելյանը նաև հավելեց. «Ձեր գնահատմամբ դա 94 տոկոս փոշիացում է, իսկ մեր համոզմամբ` դասական կոռուպցիա, որի պարագայում Ձեր իսկ մատնանշած տվյալներով այդ ոլորտի միջոցների 94 տոկոսի փոշիացում է տեղի ունեցել: Արդյո՞ք ունենալով նման տվյալներ կառավարությունը որևէ ընթացք տվել և ի՞նչ քայլեր են ձեռնարկվել»:
Տիգրան Սարգսյանն իր պատասխանում այդպես էլ չնշեց, թե այդ տվյալների հետքերով կառավարությունն ինչ քայլեր է ձեռնարկել: Նա միայն նկատեց, թե մնում է այն կարծիքին, որ գործազրկության նպաստների հին համակարգը անարդյունավետ է եղել, քանզի հաշվի չի առնվել արդյոք այդ նպստը ստացողն իրականում ունի դրա կարիքը:
«Այդ համակարգի հասցեականությունը մենք ընդամենը 6% ենք գնահատել. Մնացածների համար նպաստը եկամտի հավելյալ աղբյուր էր», պատասխանեց Տ. Սարգսյանը, հավելելով, որ 2014թ. Հայաստանում ներդրվող սոցիալական ակտիվ աջակցության փաթեթի դեպքում նպաստներ կտրամադրվեն միայն այն խմբերին, որոնք մրցունակ չեն աշխատաշուկայում: