Այսօր կեսօրից հետո Ազգային ժողովի երրորդ հարկի միջանցքներում բավականին սուր ճաշի բույր էր տարածվել: Աշխատակիցներն ու լրագրողներն իրար հարցնում էին, թե այդ ինչ հոտ է գալիս` քանի որ ԱԺ ճաշարանը գտնվում է առաջին հարկում: Հետո պարզվեց, որ այդ հոտը գալիս է ԱԺ նախագահին սպասարկող առանձին խոհանոցից, որը նույնպես գտնվում է երրորդ հարկում և մոտ է հատկապես լրագրողների հարկաբաժնին:
Այդ պահին ընդմիջման ժամ էր, իսկ երբ նիստը սկսվեց ԱԺ նախագահ Հովիկ Աբրահամյանի հետ միասին նրա առանձին` ուղիղ նիստերի դահլիճը մտնող մուտքով ներս մտան վարչապետ Տիգրան Սարգսյանը, փոխվարչապետ Արմեն Գևորգյանը և տրանսպորտի ու կապի նախարար Գագիկ Բեգլարյանը: Նրանք ներս էին մտնում գրեթե ատամները մաքրելով: Ու հասկանալի դարձավ, որ Հ. Աբրահամյանն իր մոտ ճոխ պատիվ է տվել վարչապետին, փոխվարչապետին ու ՏԿ նախարարին:
Նշենք, որ երեկ ԱԺ-ում քննարկվում էր 2013թ. բյուջեի նախագիծը, բացի այդ` երեկ կառավարության հետ հարցուպատասխանի օրն էր, ու առավոտից վարչապետն իր նախարարների հետ միասին խորհրդարանում էին: Այնպես որ, սոված կլինեին:
Հավանաբար հետաքրքիր պատահականությամբ և զուգադիպությամբ Ազգային ժողովի երրորդ հարկի միջանցքներում ճաշի նման սուր հոտ մեկ էլ ընկել էր ուղիղ 1 տարի առաջ` 2012թ. նոյեմբերի 12-ին, երբ Հ. Աբրահամյանը հյուրընկալել էր Ուրուգվայի խորհրդարանի նախագահ Խորխե Օրիկոյին: Այդ ժամանակ միջանցքներում տարածված նոր եփվող ճաշի հոտն այնքան տարբերակելի էր, որ խոսում էին, թե ԱԺ-ում խաշլամա են դրել: Եվ ուղիղ մեկ տարի առաջ էլ Հ. Աբրահամյանն իր ղեկավարած հիմնարկում տնավարի ճոխ ընդունելություն էր կազմակերպել Ուրուգվայի խորհրդարանի նախագահի ու նրա գլխավորած պատվիրակության համար:
ՀՀ ԱԺ նախագահն ընդհանրապես նման սեղանների` «ճոխ զավտրիկների» և «պինդ ուժինների» սիրահար է: Հիշեցնենք, որ այս տարի հունվարի 8-10-ը Բրյուսել կատարած այցի ժամանակ ԱԺ նախագահը հանդիպել էր Եվրախորհրդարանի նախագահ Մարտին Շուլցի հետ, ով ՀՀ պատվիրակությանը նախաճաշի էր հրավիրել: Նստելով նախաճաշի սեղանի շուրջը` ՀՀ ԱԺ նախագահը ձեռքով ցույց է տալիս ուտեստները և ասում. «Որ իմանայինք այսպիսի ճոխ, պինդ զավտրիկ կանեինք, մենք իրիկունը ուժին չէինք անի»:
Այս դրվագը պատկերող տեսանյութը դրված էր ԵԽ-ի սայթում՝ Մ. Շուլցի հետ հանդիպման և «զավտրիկի» մասին պատմող տեսանյութում:
