«Ես որոշակի հակասություն եմ տեսնում Սերժ Սարգսյանի կողմից Հանրապետության նախագահի չափանիշների և Արմեն Սարգսյանի արածի միջև․ Սերժ Սարգսյանն իր հայտնի ելույթում նշեց, որ Հանրապետության նախագահը չպետք է լինի կուսակցական, չպետք է զբաղվի քաղաքականությամբ, բայց Արմեն Սարգսյանի բոլոր հանդիպումները գալիս են ցույց տալու, որ այդ քաղաքական բաղադրիչը, այնուամենայնիվ, կա։ Հետևությունը սա է՝ Արմեն Սարգսյանի համար Սերժ Սարգսյանի կողմից առաջադրվելը լեգիտիմ չի, այսինքն՝ Արմեն Սարգսյանն իրապես փնտրում է լեգիտիմության պաշարներ՝ Սփյուռքի տարբեր համայնքների ներկայացուցիչների հետ հանդիպելով, Ղարաբաղի իշխանությունների հետ հանդիպելով և այլն, այսինքն՝ այս մարդը լեգիտիմության կարիք ունի, ինչը փաստում է, որ Սերժ Սարգսյանի կողմից առաջադրվելը լեգիտիմության գրավական չէ»,- «Առաջին լրատվական»-ի հետ զրույցում նշեց ՀՔԱ Վանաձորի գրասենյակի ղեկավար , իրավապաշտպան Արթուր Սաքունցը՝ անդրադառնալով Արմեն Սարգսյանի օրերս ԼՂՀ կատարած այցին։
Հիշեցնենք, որ ՀՀ 4-րդ նախագահի թեկնածու Արմեն Սարգսյանը երկօրյա այցով գտնվում էր Լեռնային Ղարաբաղում, որտեղ հանդիպում է ունեցել ԼՂՀ նախագահ Բակո Սահակյանի հետ։ Հանդիպումից հետո Բակո Սահակյանի աշխատակազմի ղեկավարի տեղակալ Դավիթ Բաբայանը լրատվամիջոցների հետ զրույցում հայտարարել է, որ պաշտոնական Ստեփանակերտը դրական է համարում նախագահի պաշտոնում Արմեն Սարգսյանի թեկնածությունն ու կարծում, որ ընտրվելու դեպքում նա կարող է մեծ օգուտ բերել ԼՂ կարգավորման հարցում։
«Պարտադիր չէ պաշտոնապես նա ինչ-որ բանակցային գործընթացում գտնվի, հանդիպի: Դրանով չէ միայն դերակատարությունը ամփոփվում»,-մասնավորապես ասել է Դավիթ Բաբայանը։
Արթուր Սաքունցը տարօրինակ է համարում, որ ԼՂՀ իշխանությունները նոր են ճանաչում Արմեն Սարգսյանին։ Իրավապաշտպանի խոսքերով, եթե հաշվի առնենք, որ Արմեն Սարգսյանը Մեծ Բրիտանիայում Հայաստանի դեսպանն է եղել, ապա նա որպես դեսպան պետք է որոշակի գործառույթներ իրականացրած լիներ ԼՂ խնդրի հետ կապված։
«Հետաքրքիր է, թե Ղարաբաղի իշխանությունն ի՞նչ նոր բան է հայտնաբերել այդ հանդիպման ընթացքում, որը նախկինում չգիտեին, չէ՞ որ մինչև այս էլ պիտի Արմեն Սարգսյանին իմանային նրանք․ ըստ այդմ եզրակացություն՝ կամ իրապես որևէ կերպ տեղեկացված չեն եղել ղարաբաղյան խնդրի կարգավորման հետ կապված արտաքին քաղաքականության բնագավառում Արմեն Սարգսյանի գործողություններին կամ էլ ՝ մյուս կողմից՝ շատ լավ գիտակցում են, որ Արմեն Սարգսյանը ընդհանրապես որևէ դերակատարում չի ունենալու արտաքին քաղաքականության մեջ։ Ստացվում է, որ այս հանդիպումով կրկին հանգում ենք այդ լեգիտիմության խնդրին»,- նկատեց մեր զրուցակիցը։
Մանրամասները՝ տեսանյութում։
