Մամուլում վերջին շրջանում շրջանառվում են տեղեկություններ, ըստ որոնց՝ ԱԺ հանրապետական խմբակցության կին պատգամավորների միջև լարվածություն է առաջացել: Պատճառը, ըստ «Ժողովուրդ» թերթի վերջին հրապարակումների, ընթացիկ շաբաթվա ավարտին ԱԺ նախագահ Հովիկ Աբրահամյանի պաշտոնական այցն է Բրազիլիա, Արգենտինա և Ուրուգվայ: Դա ՀՀԿ կին պատգամավորներին մտածելու տեղիք է տվել՝ ով պետք է մեկնի Հովիկ Աբրահամյանի հետ:
Պատվիրակության կազմում մշտապես լինում են Կարինե Աճեմյանն ու Մարգարիտ Եսայանը, բայց այս անգամ ցանկություն են հայտնել մեկնել նաև Ռուզաննա Մուրադյանն ու Կարինե Պողոսյանը: Ազգային ժողովի միջանցքներում ՀՀԿ-ական պատգամավոր կանայք՝ Մարգարիտ Եսայանն ու Կարինե Աճեմյանը, չկարողացան զսպել իրենց էմոցիաները անգամ լրագրողների ներկայության պարագայում: Վեճը հանկարծակի սկսվեց, անհայտ է՝ կոնկրետ ինչից, քանի որ սկզբում կանայք ցածր էին խոսում, իսկ հետո սկսեցին մեղադրել միմյանց:
«Քո ընկերուհիներն են գրել, ուրեմն մի բանից դժգոհ ես, որ գրել են»,- ասաց Աճեմյանը, ինչին Եսայանը չհամաձայնեց: Աճեմյանը նրանից պահանջեց ձայնը չբարձրացնել, ապա ասաց. «Մի հատ ձայնդ մի՛ բարձրացրու, իյա… Նոր եք եկել, մի քիչ աշխատեք, հետո…»: Նա խորհուրդ տվեց համաշխարհային հարց չդարձնել դա:
ԱԺ հասարակայնության հետ կապերի և լրատվության վարչության ղեկավար Գոհար Պողոսյանը փորձում էր հնարավորինս աննկատ մեղմել իրավիճակը, նույն կերպ էր փորձում վարվել նաև ՀՀԿ-ական պատգամավոր Նաիրա Կարապետյանը, բայց նրանց ջանքերն արդյունք չտվեցին: Պատգամավորները հեռացան, իսկ կրքերն այդպես էլ չհանդարտվեցին:
ՀՀԿ-ական պատգամավորներ Ռուզաննա Մուրադյանը և Կարինե Պողոսյանը հրաժարվեցին մեկնաբանել՝ իրենք ևս դժգոհություններ ունեն թե ոչ: Նրանք նշեցին, թե անգամ տեղյակ չեն՝ ինչի մասին են իրենց հարցնում:
